Eńbek naryǵy: bos oryndar kóbeıip, túıindemeler sany azaıdy
ASTANA. KAZINFORM — Bıylǵy jyldyń naýryz aıynda Enbek.kz elektrondyq eńbek bırjasynda jumys berýshiler 102,6 myń bos jumys ornyn jarııalady, al jumys izdeýshiler 107,1 myń túıindeme ornalastyrdy. Bul týraly vedomstvonyń baspasóz qyzmeti málim etti.
Jyldyń basynan beri platformada 304,3 myń bos jumys orny jáne 394,4 myń túıindeme jarııalanǵan.
— Aqpan aıymen salystyrǵanda bos jumys oryndarynyń sany 3,7%-ǵa artty, al túıindemeler sany 14,3%-ǵa qysqardy. Nátıjesinde eńbek naryǵyndaǵy suranys pen usynys arasyndaǵy alshaqtyq edáýir qysqardy: qańtar aıynda túıindemeler sany bos jumys oryndarynan shamamen 60 myńǵa artyq bolsa, aqpanda bul kórsetkish 26 myńǵa deıin tómendedi, al naýryz qorytyndysy boıynsha aıyrmashylyq shamamen 4,5 myń túıindemeni qurady, — delingen habarlamada.
Salalyq qurylym boıynsha suranysta bilim berý salasy (22,6 myń bos jumys orny) jáne ózge de qyzmetter kórsetý baǵyty (21,2 myń bos jumys orny) kósh bastap tur. Sonymen qatar densaýlyq saqtaý jáne halyqqa áleýmettik qyzmet kórsetý salasynda (8,7 myń), aýyl, orman jáne balyq sharýashylyǵynda (7,9 myń bos jumys orny) suranys joǵary deńgeıde saqtalyp otyr.
Óńirlik bólinis boıynsha bos jumys oryndarynyń kóbi Túrkistan (7,7 myń), Qaraǵandy oblystarynda (7,6 myń), Astana qalasynda (7,2 myń), Pavlodar (7,2 myń) jáne Atyraý oblystarynda (6,5 myń) tirkeldi.
— Biliktilik deńgeıi turǵysynan suranys qurylymynda orta deńgeıdegi bilikti mamandarǵa degen qajettilik basym — olardyń úlesi barlyq bos jumys oryndarynyń shamamen 40%-yn quraıdy. Biliktiligi tómen pozıtsııalarǵa suranys 31% bolsa, joǵary bilikti mamandarǵa degen qajettilik 29% deńgeıinde qalyptasty, — dep habarlady vedomstvodan.
Jumys izdeýshilerdiń ishinde 35 jasqa deıingi úmitkerler úlesi basym — 42%. 35-44 jas aralyǵyndaǵy azamattar 26%-dy, 45-54 jas aralyǵyndaǵylar 20%-dy, al 55 jastan asqandar 12%-dy quraıdy. Genderlik bóliniste: 54% — áıelder, 46% — erler.
Jumys kúshi usynysynyń biliktilik qurylymy jalpy alǵanda suranysqa sáıkes keledi: túıindemelerdiń 42%-y orta bilikti mamandarǵa, 30,5%-y joǵary bilikti mamandarǵa jáne 27,5%-y tómen bilikti úmitkerlerge tıesili.
Naýryz aıynda eń joǵary jalaqy usynylǵan bos jumys oryndarynyń qatarynda zań jumysy jónindegi bólim basshysynyń orynbasary (≈1,4 mln teńge), baǵdarlamalyq qamtamasyz etý arhıtektory (≈1,38 mln teńge) jáne óndirýshi ónerkásiptegi óndiris basshysy (≈1,14 mln teńge) bar.
Al jumys izdeýshiler arasynda HR bıznes-seriktesi (≈4,2 mln teńge), karotajshy (≈3,0 mln teńge) jáne ónerkásip salasyndaǵy zerthana basshysy (≈2,5 mln teńge) laýazymdarynan joǵary jalaqy kútetini baıqaldy.
Buǵan deıin bıyl 22 myńnan astam adam kásiptik oqýmen qamtylǵanyn jazdyq.
