Eńbek naryǵy: Astana, Pavlodar jáne Túrkistan bos jumys oryndary boıynsha kósh bastady
ASTANA. KAZINFORM — 2026 jyldyń qańtar-mamyr aılarynda respýblıka jumys berýshileri Elektrondyq eńbek bırjasynda 495,7 myń bos jumys ornyn jarııalady.
Bul 2025 jyldyń sáıkes kezeńimen salystyrǵanda 11,2 myńǵa nemese 2,3%-ǵa artyq (484,5 myń). Eńbek resýrstaryna turaqty suranys ekonomıkanyń barlyq negizgi salalarynda saqtalýda. Ásirese aýyl sharýashylyǵy, ónerkásip jáne qurylys salalarynda ósim qarqyny joǵary boldy.
Aılar bólinisinde ótken jyldyń sáıkes kezeńimen salystyrǵanda eń joǵary ósim naýryz aıynda (+27,6%) jáne sáýirde (+7,4%) tirkeldi. Qańtar aıyndaǵy kórsetkish te ótken jyldyń deńgeıinen 3,6%-ǵa joǵary boldy.
Salalar boıynsha eń kóp bos jumys orny bilim berý baǵytynda jarııalandy. Bul salada 120,3 myń vakansııa ornalastyrylyp, jalpy suranystyń shamamen 24%-yn qurady.
Sonymen qatar óndiristik jáne agroónerkásiptik sektorlarda kadrlarǵa degen suranystyń aıtarlyqtaı artqany baıqalady. Bul naqty sektordaǵy ekonomıkalyq belsendiliktiń kúsheıgenin kórsetedi:
- aýyl, orman jáne balyq sharýashylyǵy salasynda 37,5 myń bos jumys orny usynyldy, bul 2025 jyldyń sáıkes kezeńimen salystyrǵanda 61,8%-ǵa kóp;
- taý-ken óndirý ónerkásibinde kadrlarǵa suranys 48%-ǵa ósip, 8,4 myń vakansııany qurady;
- óńdeý ónerkásibinde ósim 31,1% bolyp, 37,8 myń bos jumys orny jarııalandy;
- qurylys salasynda vakansııalar sany 26,6%-ǵa artyp, 32,1 myńǵa jetti.
Sondaı-aq ózge qyzmet túrlerin kórsetý salasynda da oń ósim baıqaldy — munda 75 myń bos jumys orny jarııalanyp, ótken jyldyń sáıkes kezeńimen salystyrǵanda 35,9%-ǵa artty. Kásibı, ǵylymı jáne tehnıkalyq qyzmet salasynda da suranys 34,6%-ǵa ósip, 10,9 myń vakansııany qurady.
Óńirler bólinisinde bes aı ishinde eń kóp bos jumys orny Astana qalasynda (41 myń), Pavlodar oblysynda (34,8 myń) jáne Túrkistan oblysynda (33,9 myń) tirkeldi. Al ótken jylmen salystyrǵanda kadrlarǵa suranystyń eń joǵary ósimi Atyraý oblysynda (+63,2%), Aqmola oblysynda (+43,7%) jáne Túrkistan oblysynda (+23,2%) baıqaldy.
Jalpy alǵanda, 2026 jyldyń qańtar-mamyr aılaryndaǵy jıyntyq kórsetkishter elimizdiń eńbek naryǵynda turaqty oń úrdis saqtalǵanyn kórsetedi. Ásirese ónerkásip pen agrarlyq sektorlarda suranystyń artýy otandyq óndiristiń sapaly damyp kele jatqanyn aıǵaqtaıdy. Qazirgi ýaqytta eńbek naryǵynda jumys izdeýshiler úshin barlyq óńirler men negizgi salalar boıynsha jumyspen qamtýdyń keń múmkindikteri usynylyp otyr.
Aıta ketelik Tanda.enbek.kz portalynda vakansııalar jármeńkesi ótip turatyny týraly jazǵan edik.
