Eńbek mınıstrliginiń jańa basshysy qazirgi ýaqytta zeınet jasyn kóterý qajettiligi týyndap otyrǵan joq dep sanaıdy
ASTANA. 26 qyrkúıek. QazAqparat - Qazirgi ýaqytta zeınet jasyn kóterý qajettiligi týyndap otyrǵan joq. Bul týraly búgin BAQ ókilderine jańa taǵaıyndalǵan elimizdiń Eńbek jáne halyqty áleýmettik qorǵaý mınıstri Serik Ábdenov bildirdi.
«Meniń oıymsha, bul másele tyńǵylyqty zerdeleýdi qajet etedi. Degenmen qazirgi ýaqytta zeınet jasyn kóterý qajettiligi týyndap otyrǵan joq dep sanaımyn», - dedi ol.
Onyń atap ótýinshe, búgingi tańda elimizdegi zeınet jasy halyqaralyq uıymdar deńgeıinde qarastyrylyp bekitilgen.
Sonymen qatar ol aldaǵy ýaqytta mınıstrlik buǵan deıingi baǵytta jumys istep, áleýmettik salada qabyldanǵan barlyq baǵdarlamalardy júzege asyra beretindigin basa aıtty.
«Buǵan qosymsha búgin Elbasynyń qabyldaýynda bolǵanymda biraz mindetter aldyma qoıyldy. Solardy aldaǵy ýaqytta oryndaıtyn bolamyz», - dedi S. Ábdenov.
