15:57, 15 Sáýir 2022 | GMT +6
Eńbek mınıstrliginiń ókilderi múgedek jandardan para aldy dep aıyptalýda
NUR-SULTAN. QazAqparat - QR Eńbek jáne halyqty áleýmettik qorǵaý mınıstrliginiń aýmaqtyq ókilderi múmkindigi shekteýli azamattardan para alyp kelgen dep aıyptalýda. Bul týraly QazAqparat QR Sybaılas jemqorlyqqa qarsy is-qımyl agenttigine silteme jasap habarlaıdy.
QR Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń Atyraý oblystyq departamentiniń basshysy jáne osy vedomstvonyń bólim basshysyna qatysty isti tergeýde. Atalǵan tulǵalarǵa múgedektikti rastaıtyn qujatty kedergisiz uzartý úshin múmkindigi shekteýli azamattardan 30 myńnan 70 myń teńgege deıin para alyp keldi dep aıyp taǵylyp otyr.
«Qylmystyq-protsestik kodeksiniń 201-babyna sáıkes ózge aqparat tergeý múddesine oraı jarııalaýǵa jatpaıdy», - delingen vedomstvo málimetinde.
