Eńbek mınıstrliginiń aqparattyq júıesine 34 myńdaı qazaqstandyq júgindi
dep habarlady Jumyspen qamtý máseleleri jónindegi aqparattyq-taldaý bólimniń dırektory Alma Dáýitova Pm.kz saıtyna bergen suhbatynda.
Aqparattyq-taldaý ortalyǵy eńbek naryǵy týraly málimetterdi jınaýmen jáne óńdeýmen, onyń ishinde «Jumyspen qamtý-2020» baǵdarlamasynyń iske asyrylý barysy týraly málimetterdi óńdeýmen aınalysady. «Óńdelgen barlyq málimetter Úkimetke, memlekettik organdarǵa joldanady jáne halyqty habardar etý úshin eki Internet-resýrsqa - enbek.gov.kz jáne «Jumyspen qamtý-2020» baǵdarlamasynyń saıttarynda jarııalanady», - dedi Alma Dáýitova.
Baǵdarlamanyń Internet resýrsyna ákimdikter onlaın-rejımde baǵdarlamanyń óńirlerde júzege asyrylý barysy týraly jedel málimetterdi ornalastyrady. Sondaı-aq, bul saıtqa atalmysh baǵdarlamany júzege asyrýǵa arqaý bolyp otyrǵan normatıvtik-quqyq baza da ornalastyrylǵan.
Eńbek naryǵyndaǵy suranystar men usynystar týraly málimetterdi berip otyrý bólimniń mańyzdy jumystarynyń biri ekendigine toqtalǵan ol: «Saıtta sondaı-aq, jumys berýshilerge bos jumys oryndary týraly málimetterdi óz betterinshe jarııalaý jáne úmitkerlerdi tańdaý múmkindigi berilgen. Bizde jumyspen qamtý organdarynda tirkelgen jumyssyzdardyń bazasy, rezıýme ortalyǵy, respýblıkamyzdaǵy oqý oryndaryn bitirgen túlekterdiń bazasy jáne «Bolashaq» baǵdarlamasy túlekteriniń bazasy bar»,- dep atap kórsetti ortalyq dırektory óz sózinde.
A.Dáýitovanyń aıtýynsha, búgingi tańda 33 950 qazaqstandyq ortalyqqa júgingen.
