Eńbek mınıstrligine jumys ornynda etnosaralyq kemsitýshilikti boldyrmaý quzyreti berilmek

ASTANA. QazAqparat – Eńbek jáne halyqty áleýmettik qorǵaý mınıstrligine jumys oryndarynda ulty men tiline qatysty kemsitýshilik áreketterine jol bermeýdi qamtamasyz etetin quzyret berilmek. Mundaı usynys Ashyq NQA saıtynda jarııalanǵan Úkimet qaýlysynda kórsetilgen, dep habarlaıdy QazAqparat tilshisi.

«Eńbek jáne halyqty áleýmettik qorǵaý mınıstrligi týraly erejesiniń 15-tarmaǵy teń múmkindikter, toleranttylyq qaǵıdattaryn saqtaý men áleýmettik, násildik, ulttyq jáne tildik belgileri boıynsha quqyqtarǵa nuqsan keltirýge jol bermeýdi qamtamasyz etý, sondaı-aq áleýmettik-eńbek qatynastarynda etnosaralyq jáne ózge de kez kelgen kemsitýshiliktiń týyndaýynyń aldyn alý tarmaqshasymen tolyqtyrylsyn. Buǵan qosa, ótinish berýshiler kóteretin júıeli problemalardy taldaý jáne anyqtaý jumystary uıymdastyrylsyn», - dep kórsetilgen qujatta.

Atalǵan ózgeristi engizý 2022 jylǵy 25 mamyrdaǵy Qazaqstan halqy Assambleıasynyń XXXI sessııasynda júktelgen mindetterdi oryndaý maqsatynda qolǵa alynǵan. Qaýlyny ashyq talqylaý 4 qarashaǵa deıin jalǵasady.