Eńbek mınıstrliginde Ulttyq resýrstyq ortalyqtyń tusaýkeseri ótti
Kezdesýdi ashqan QR Eńbek jáne halyqty áleýmettik qorǵaý mınıstri Mádına Ábilqasymova Memleket basshysynyń Qazaqstan halqyna arnaǵan jańa Joldaýynda kórsetilgen tapsyrmalaryn eskere otyryp, áleýmettik máselelerdi jáne áleýmettik qyzmetterdi sheshý El saıasatynyń mańyzdy baǵytynyń biri ekenin atap ótti.
«Qazaqstan halqynyń ómir súrý sapasyn jaqsartý úshin halyqaralyq standarttarǵa sáıkes, búgingi kúni bizdiń elimizde áleýmettik qyzmetterdiń jańa túrlerin engizý jáne áleýmettik qyzmetterdi jańǵyrtý arqyly onyń sapasyn arttyrý mindeti tur. Osyǵan baılanysty áleýmettik qyzmet kórsetý men kómek kórsetýdiń keshendi úlgisin engizý bastaldy, ol áleýmettik qyzmetkerlerdiń bilim berý, densaýlyq saqtaý, áleýmettik qorǵaý jáne basqa da salalardaǵy jumysyn úılestirý tetigin jetildirýdi kózdeıdi, bul muqtaj azamattarǵa «bir tereze» qaǵıdaty boıynsha áleýmettik qyzmet kórsetýdi qamtamasyz etedi»,- dedi Mádına Ábilqasymova.
Áleýmettik qyzmetterdiń sapasyn jaqsartý maqsatynda osy sala mamandarynyń bilim deńgeıi men praktıkalyq daǵdylaryn arttyrý mańyzdy másele bolyp otyr.
«Búgingi kúni Qazaqstan Respýblıkasynyń halyqty áleýmettik qorǵaý salasynda 10 myńnan astam áleýmettik jumysshy eńbek etip keledi, olar arnaýly áleýmettik qyzmetterge muqtaj 116,8 myń adamǵa qyzmet kórsetedi. Bul rette, atalǵan ortalyqtyń aldynda barlyq deńgeıdegi áleýmettik jumyskerlerdi joǵary, orta jáne joǵary oqý ornyna deıingi oqý oryndarynda kásiptik daıarlaý standarttaryn júıelendirý, sondaı-aq ortalyq jáne aýmaqtyq deńgeıde áleýmettik jumyskerlerdi daıarlaý, qaıta daıarlaý boıynsha úlken mindetter qoıylǵan», -dedi vedomstvo basshysy.
Sondaı-aq, Qazaqstan Respýblıkasy Parlamentiniń depýtattary, memlekettik organ ókilderi, qoǵamdyq birlestik basshylary Áleýmettik jumys boıynsha Ulttyq resýrstyq ortalyǵynyń tusaýkeserine qatysyp, osy baǵyttaǵy jumystardy jandandyrýdyń mańyzdylyǵy men qajettiligin atap ótti.
