Eńbek mınıstrligi jańa jyldyq korporatıvtiń ornyna balalarǵa erteńgilik ótkizedi

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi jańa jyldyq korporatıvtiń ornyna balalarǵa arnalǵan qaıyrymdylyq sharasyn ótkizedi, dep habarlaıdy QazAqparat mınıstrlik saıtyna silteme jasap.

«QR Eńbek jáne halyqty áleýmettik qorǵaý mınıstrliginiń qyzmetkerleri merekelik korporatıvti sharanyń ornyna tabysy az jáne kópbalaly otbasylardan shyqqan 300 balaǵa, sondaı-aq múgedektigi bar balalarǵa arnalǵan qaıyrymdylyq jańa jyldyq tańerteńgilik ótkizýge sheshim qabyldady», delingen habarlamada.

Mınıstrlik ujymy muqtaj otbasylardyń balalaryna tańerteńgilikti jáne syılyqtardy uıymdastyrýǵa erikti túrde qarajat jınady.

«Biz Eńbek jáne halyqty áleýmettik qorǵaý mınıstrliginde jumys isteımiz. Bizdiń ujymnyń árbir qyzmetkeri kómekke jáne áleýmettik qoldaýǵa muqtaj qazaqstandyqtardyń ómirin jaqsartýǵa óz úlesin qosady. Bul qaıyrymdylyq aktsııasy bıylǵy jyly jumysymyzdyń jaqsy aıaqtalýy bolady dep esepteımin! Al, balalarǵa mereke syılaý – ıgi is», - dedi QR Eńbek jáne halyqty áleýmettik qorǵaý mınıstri Birjan Nurymbetov.

Jańa jyldyq erteńgilikke shaqyrylatyn balalardyń tizimin mınıstrlik qyzmetkerleri elordalyq ákimdiktiń mamandarymen birlesip jasady. Oǵan tabysy az, kópbalaly otbasylardan shyqqan 300 bala, sondaı-aq múgedek balalar kirdi.

Merekelik shara 29 jeltoqsanda ál-Farabı atyndaǵy Oqýshylar saraıynda ótedi. Balalar Aıaz ata men Aqshaqarmen birge shyrshanyń aınalasynda bılep, «Aq patshaıym» teatrlandyrylǵan qoıylymyn tamashalap, syılyqtar alady.

Eske sala ketsek, almatylyq muǵalimder Jańa jyldyq keshten bas tartqan edi.