Eńbek mınıstrligi taǵy 4 áleýmettik tólemdi sms arqyly taǵaıyndaı bastady
«Osylaısha, memleket azamatqa sms-habarlama jiberý arqyly qyzmet kórsetý protsesine bastamashylyq jasaıdy. Oǵan jaýap bergen jáne banktik shottyń nómiri rastalǵan kezde tólemder avtomatty túrde qysqa merzimde taǵaıyndalady. Qyzmetti proaktıvti formatta alý úshin Mobıldi azamattar bazasynda tirkelý qajet. Muny egov.kz saıtyndaǵy jeke kabınette nemese Halyqqa qyzmet kórsetý ortalyǵynda jasaýǵa bolady», - delingen mınıstrliktiń aqparatynda.
Buǵan deıin júktilikke jáne bosanýǵa baılanysty, sondaı-aq asyraýshysynan jáne jumysynan aırylýǵa qatysty tólemderdi alý úshin HQKO-ǵa, jumyspen qamtý ortalyqtaryna nemese qujattar tizimimen egov.kz-ke júginý qajet bolatyn. Qyzmet kórsetý merzimi bir aptadan 30 kúnge deıin sozyldy.
Esterińizge sala keteıik, «Tsıfrlyq Qazaqstan» memlekettik baǵdarlamasy aıasynda QR Eńbek jáne halyqty áleýmettik qorǵaý mınıstrligi qazirdiń ózinde bala týý boıynsha jáne batyr analarǵa járdemaqyny proaktıvti túrde taǵaıyndaıdy, sondaı-aq zeınetaqy taǵaıyndaý boıynsha keshendi formatta qyzmet kórsetedi.
