Eńbek mınıstrligi shetelden jumysshy tartatyn kásiporyndarǵa jyl saıyn tekserý júrgizbek
NUR-SULTAN. QazAqparat –Eńbek jáne halyqty áleýmettik qorǵaý mınıstri Birjan Nurymbetov shetelden jumys kúshin tartatyn kásiporyndar júrgizilgen tekserý jumysynyń nátıjesin jarııalady, dep habarlaıdy QazAqparat tilshisi.
«Qazirgi tańda sheteldik jumys kúshin tartatyn 2200 kásiporyn bar. Onyń ishinde qazaqstandyqtardyń úlesi 96 paıyz. Joǵaryda kórsetilgen eńbek daýlarynyń sebepterin eskere otyryp, el Prezıdentiniń tapsyrmasy boıynsha prokýratýra organdarymen birlese otyryp, 30-dan astam sheteldik jumys kúshin tartatyn 95 kásiporynǵa qatysty tekserýdi aıaqtadyq. Nátıjesinde, eńbek jáne kóshi-qon zańnamasyn buzý boıynsha 930 fakti anyqtalyp, joıyldy. 474 jergilikti jáne sheteldik jumyskerdiń jalaqysynyń aıyrmashylyǵy anyqtalyp, sáıkestendirildi. Tekserý nátıjesi boıynsha 681 ruqsattama keri qaıtarylyp, 393 sheteldik elden shyǵaryldy», - dedi Birjan Nurymbetov Úkimet otyrysynda.
Mınıstr sonymen qatar, bul rette zańnamalyq normalarǵa túzetýler ázirlep jatqanyn aıtty.
«Olar ákimshilik jaýapkershilikti kúsheıtýdi jáne shetelden jumys kúshin tartatyn kásiporyndarǵa jyl saıyn tekserýdi, jyl saıynǵy kvotalar kólemin jáne jumysshylar mamandyqtary boıynsha sheteldik personaldy qysqartýdy, úshinshi jáne tórtinshi sanat boıynsha tartylatyn sheteldik jumyskerlerdi qazaqstandyq kadrlarmen aýystyrýdy kózdeıdi. Óńirler ákimdikterine sheteldik jumys kúshin tartýǵa kvotany eńbek naryǵyn jan-jaqty zerdeleý júrgizgennen keıin qalyptastyrýy tıis», - dedi ol.
Eske sala ketsek, Úkimet basshysy jalaqyny bermeýdiń jumys berýshi úshin tıimsiz bolatyndaı etip zańnama normasyn kúsheıtýdi tapsyrdy.
