Eńbek mınıstrligi óz betinshe jumyspen aınalysýshylardy esepke alýdyń jańa ádistemesin ázirleýde
ASTANA. 25 shilde. QazAqparat - Qazaqstanda óz betinshe jumyspen aınalysýshylardy esepke alýdyń jańa ádistemesi ázirlenýde, dedi QR Eńbek jáne halyqty áleýmettik qorǵaý vıtse-mınıstri Birjan Nurymbetov pm.kz saıtyna bergen suhbatynda.
«Biz Eńbek jáne halyqty áleýmettik qorǵaý mınıstriniń tóraǵalyq etýimen óz betinshe jumyspen aınalysýshy halyqty esepke alý jónindegi usynysty zertteıtin jumys tobyn qurdyq», - dedi vıtse-mınıstr.
B.Nurymbetovtyń aıtýynsha, elimizdiń ekonomıkalyq belsendi halqy qurylymynda óz betinshe jumyspen aınalysýshylardyń úlesi 32 paıyz kóleminde eken. «Respýblıkadaǵy óz betinshe jumyspen aınalysýshy halyqtyń úles salmaǵy aıtarlyqtaı úlken - ol ekonomıkalyq belsendi halyqtyń 32 paıyzy quraıdy, osylardyń 71 paıyzy negizinen aýylda turatyndar. óz betinshe jumyspen aınalysýshylardyń basym kópshiligi qandaı da bir jumys túrimen shuǵyldanatyndar, biraq olar tirkelmegen, ıaǵnı zeınetaqymen qamtamasyz etý júıesinen de, mindetti áleýmettik saqtandyrý júıesinen de tys qalǵan, ári salyq ta tólemeıdi», - dep qosty ol.
Sonymen qatar, búgingi kúngi eń birinshi kezektegi másele - óz betinshe jumyspen aınalysýshy halyqty zańdy tabyspen qamtamasyz etý, sóıtip olardyń barlyq áleýmettik júıelerge qatysýyna jol ashý.
Osyǵan baılanysty eki jol bar: birinshi jol - óz betinshe jumyspen aınalysýshy azamattardy qaıta oqytyp, olardy jaldamaly jumyskerler qataryna qosý, ekinshisi - «Jumyspen qamtý baǵdarlamasy-2020» arqyly atalǵan tulǵalarǵa shaǵyn nesıe berip, olardyń ózderiniń azǵantaı bıznesterin keńeıtý nemese ashýlaryna múmkindik berip, ony zańdy ári esepti etý.
«Ózderiniń azǵantaı bıznesterimen aınalysatyn adamdarǵa salynatyn salyq rejimin jeńildetýge kóshý sharalary qabyldanyp ta qoıyldy, biz qazir jumys isteıtin jáne jeke kásipker retinde tirkelgen adamdardyń esebin alýdamyz», - dep atap ótti vıtse-mınıstr.
Sondaı-aq, aýyl sharýashylyǵy jáne aýyldyq ákimdikter qurylymdarymen birlesip, jerde jumys isteıtin tulǵalardy sanaqtan ótkizip, olardyń jeke kásipker, bolmasa jaldamaly jumysker retinde tirkeý arqyly qyzmet túrlerin esepke alý úshin qaıta tirkeý josparlanýda.
Eńbek mınıstrliginiń aqparatyna qaraǵanda, olardyń qalǵan bóligi «Jumyspen qamtý baǵdarlamasy-2020» quraly túrindegi memlekettik qoldaýǵa ıe bolatyn kategorııaǵa jatqyzylatyn bolady. Óz betinshe jumyspen aınalysýshy halyqty esepke alýǵa óńirlerdegi Jumyspen qamtý Kartasy kómekke keledi, olar jumyssyzdar qataryna qosylmaıtyn, óz betinshe jumyspen aınalysatyn jurtshylyqtyń úlesin naqty kórsetip bere alady.
Búgingi kúni óz betinshe jumyspen aınalysýshylardy esepke alý 21 myń úı sharýashylyqtaryn suraý- statıstıka jolymen tekserý arqyly júrgizilýde. «QR Prezıdentiniń tapsyrmasy boıynsha qurylǵan bizdiń jumys tobymyz belgilengen merzim ishinde óz betinshe jumyspen aınalysýshy jurtshylyqty esepke alý júıesin jáne olardy zertteý ádisterin jasap bitiredi dep oılaımyz», - dep qorytyndylady sózin B.Nurymbetov.
