Eńbek mınıstrligi men ıAndeks.Taksı azamattardy jumyspen qamtýǵa arnalǵan pılottyq jobany bastady

ASTANA. QazAqparat - Eńbek jáne halyqty áleýmettik qorǵaý mınıstrligi Memlekettik kirister komıtetimen birlesip, ınternet-platformamen qyzmet kórsetetin tulǵalardy salyqtyq ákimshilendirýdiń ózgeshe tártibin qoldaný jónindegi pılottyq jobany iske asyrýǵa kiristi, dep habarlaıdy QazAqparat.

Jobanyń máni ınternet-platformalar arqyly jumyspen qamtylǵandardy áleýmettik qamsyzdandyrý júıesine tartý bolyp tabylady. Osyndaı ınternet-platformalardyń biri – «ıAndeks.Taksı» bolyp sanalady, olarman tıisti kelisimge qol qoıylǵan.

«ıAndeks» ınternet-platformasynda tirkelgen taksı júrgizýshileri pılottyq jobaǵa erikti túrde qatysa alady. Ol úshin Azamattarǵa «e-salyq Business» mobıldik qosymshasyn paıdalanyp, arnaıy salyq rejımin qoldana otyryp, jeke kásipker retinde tirkelý qajet.

Pılottyq joba sheńberinde jeke tabys salyǵyn, áleýmettik aýdarymdardy, mindetti zeınetaqy jarnalaryn jáne taksı júrgizýshileriniń tabysynan medıtsınalyq saqtandyrý jarnalaryn tóleý jónindegi mindettemeler ınternet-platforma operatoryna («ıAndeks.Taksı») júkteletin bolady.

Internet-platforma operatorynan alynatyn oryndaýshylardyń tabystary týraly málimetter negizinde salyq pen áleýmettik tólemder somalaryn esepteýdi memlekettik kirister organdary júzege asyrady ári operatorǵa taksı júrgizýshileriniń tabystary boıynsha eseptelgen salyq jáne áleýmettik tólemder somalary týraly málimetterdi beredi.

Internet-platforma operatory salyq pen áleýmettik tólemderdi ustap qalýdy jáne tóleýdi keıinnen tıisti qorlar arasynda bólý ári aýdarý úshin «Azamattarǵa arnalǵan úkimet» memlekettik korporatsııasynyń bank shotyna árbir áleýmettik tólemge jeke tólem tapsyrmalary arqyly júrgizetin bolady.

Joǵaryda atalǵan tetikterdi iske asyrý maqsatynda qazirgi ýaqytta «ıAndeks.Taksı» jáne Qarjymıniniń Memlekettik kirister komıtetiniń aqparattyq júıelerin tehnıkalyq ıntegratsııalaý boıynsha jumys júrgizilýde.

Sonymen qatar Digital ID arqyly bıometrııalyq sáıkestendirýden ótý jolymen «ıAndeks.Taksı» mobıldi qosymshasynda tirkelý rásimin jeńildetý josparlanýda.

Daıyndyq rásiminiń aıaqtalýy jáne pılottyń tolyq iske qosylýy 2023 jyldyń 1 shildesinen bastalady dep kútilýde.