Eńbek mınıstrligi qyzmetkerlerdi jumysta zańsyz ustaý faktilerine jaýap berdi
ASTANA. QazAqparat -QR Eńbek jáne halyqty áleýmettik qorǵaý vıtse-mınıstri Svetlana Jaqypova bloger jáne qoǵam qaıratkeri Ǵalym Baıtuqtyń atalmysh vedomstvo basshylyǵy qyzmetkerlerin jumysta zańsyz ustaıtyndyǵyna qatysty synyna pikir bildirdi, dep habarlaıdy QazAqparat tilshisi.
«Baıtuqtyń pikirin oqyǵan joqpyn, sondyqtan bul turǵyda eshteńe aıta almaımyn. Bizde jumys rejiminde eńbek qyzmetin júzege asyrýǵa monıtorıng júrgiziledi. Keshki saǵat 18:30-da vedomstvodaǵy kompıýterler avtomatty túrde óshedi. Eger de Úkimetten shuǵyl tapsyrma kelse nemese Parlamentten jedel saýaldar bolsa, onda kompıýterdi qosýǵa tıisti ótinim jazylady», - dedi vıtse-mınıstr Úkimet úıinde ótken baspasóz máslıhatynda.
Budan buryn habarlanǵandaı, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń arnaıy monıtorıng tobynyń múshesi Ǵalym Baıtuq qyzmetkerler quqyǵy úshin júrgizilgen kúres jóninde aıtyp bergen edi.
Atalǵan top qyzmetkerlerdi jumysta zańsyz ustaý faktilerin anyqtaý maqsatynda túrli memlekettik organdarǵa jospardan tys tekserý júrgizip keledi.
«Biz Astana ákimdigin, óńirlerdi jáne mınıstrlikterdi tekserip shyqtyq. Tobymyzdyń habarlaýynsha, QR Bilim jáne ǵylym mınıstrligi men Eńbek jáne halyqty áleýmettik qorǵaý mınıstrlikteri qyzmetkerlerge qatysty birqatar quqyqbuzýshylyqtarǵa jol bergen», - dedi ol.
