Eńbek mınıstrligi qart adamdardyń ómir súrý sapasyn arttyrý josparyn bekitti
Qujat Qazaqstannyń 2030 jylǵa deıingi áleýmettik damý tujyrymdamasyn jáne «Nur Otan» partııasynyń saılaýaldy baǵdarlamasyn iske asyrý sheńberinde ázirlendi. Onda áleýmettik saıasattyń basym baǵyttarynyń biri qarttardyń ómir súrý sapasyn jaqsartý bolyp tabylady, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Josparda 9 baǵyt boıynsha 36 is-shara qarastyrylǵan. Olardyń barlyǵy aǵa býynnyń ómir súrý sapasyn, ómir uzaqtyǵyn arttyrýǵa, áleýmettik jáne psıhologııalyq jaǵdaıyn jetildirýge baǵyttalǵan.
Qujat qarttardyń quqyqtaryn saqtaý materıaldyq jaǵdaıyn jetildirý jáne olardyń jumyspen qamtylýyn deńgeıin artyrý, qart adamdary bar otbasylardy qoldaý sııaqty máselelerdi qamtıdy.
Mysaly, qarttardyń bos ýaqytyn uıymdastyrýǵa jaǵdaı jasaý baǵytynda elimizdiń barlyq óńirlerinde belsendi ómir súrý ortalyqtaryn ashý, qart adamdar úshin mádenı-buqaralyq is-sharalar ótkizý, qarttar kúnin merekeleýge arnalǵan is-sharalar ótkizý jáne t. b. josparlanýda.
Ulttyq jospardy ázirleý kezinde Madrıdtiń qartaıý máseleleri jónindegi halyqaralyq is-qımyl josparynyń usynystary eskerildi. Onda qart adamdardyń tek áleýmettik qamtamasyz etilýine ǵana emes, sonymen qatar zııatkerlik jáne óndiristik tájirıbe ıesi, qoǵam damýynyń belsendi qatysýshylary retinde suranysqa ıe bolýyna baǵyttalǵan sharalar qarastyrylǵan.
Búgingi tańda Qazaqstan BUU anyqtaǵan 7 paıyzdyq shekti eńserip, halqy qartaıǵan elderge jatqyzyldy. Elimizdiń 8 aımaǵyna qartaıý protsesi tán.
Máselen, eldiń soltústik-shyǵysynda jáne Ortalyq Qazaqstannyń bir bóliginde jaǵdaı Eýropa elderimen uqsas, ıaǵnı halyqtyń az tabıǵı ósimi jáne kóshi-qonnyń teris saldosy sebebinen jas adamdarmen salystyrǵanda egde adamdar sanynyń tez ósýine baılanysty halyqtyń qartaıýy oryn alady.
Respýblıkanyń ońtústik jáne batys óńirlerinde, sondaı-aq Nur-Cultan qalasynda bala týýdyń ósýi esebinen 15 jasqa deıingi halyq úlesiniń ulǵaıýy baıqalady, nátıjesinde halyqtyń qartaıý kórsetkishi tómendeıdi.
Іs-sharalar josparymen enbek.gov.kz saıtynda tanysýǵa bolady.
