Eńbek mınıstrligi halyqtyń borysh júktemesin azaıtý úshin ne isteıdi
NUR-SULTAN. QazAqparat - Eńbek jáne halyqty áleýmettik qorǵaý mınıstrligine qarasty azamattardyń jekelegen sanattaryn áleýmettik qorǵaý isteri basqarmasynyń basshysy Asqar Nııazov QR Prezıdentiniń qazaqstandyqtardyń borysh júktemesin tómendetý týraly Jarlyǵy aıasynda vedomstvoǵa qandaı mindetter júktelgenin aıtty, dep habarlaıdy QazAqparat tilshisi.
Asqar Nııazov memleket qabyldaǵan sharalar Memleket basshysynyń saılaý aldyndaǵy naýqanynda aıtylǵan baǵdarlamadan týyndaǵanyn aıtady.
«Bul Jarlyq der kezinde shyqty. Ózderińiz biletindeı, Prezıdent Qasym-Jomart Toqaevtyń saılaýaldy kampanııasynda áleýmettik baǵyttaǵy saıasat jalǵastatynyn jáne halyqtyń naqty tabysyn arttyrý boıynsha sharalar qabyldanatynyn aıtqan bolatyn. Bul Jarlyq barlyq azamattarǵa emes, belgili bir sanattarǵa - halyqtyń áleýmettik osal toptaryna arnalǵan. Olar - kóp balaly otbasylar, múgedek balalary bar otbasylar, jetim balalar, asyraýshysynan aıyrylǵan otbasylar», - dedi basqarma basshysy.
Sonymen qatar, Asqar Nııazov Eńbek mınıstrligi Jarlyq aıasynda qandaı jumys júrgizetinin aıtty.
«Jarlyqty júzege asyrý tártibin Ulttyq bank pen Qarjy mınıstrligi pysyqtaıdy. Eńbek jáne halyqty áleýmettik qorǵaý mınıstrligi atalmysh sanattardy usynýǵa quzyretti bolady. Nesıeni óteý tártibi belgili bolǵan jaǵdaıda, ótinish berýshi adamnyń áleýmettik jaǵynan qanshalyqty osal ekenin anyqtap, qarastyrylǵan sanatqa jatatynyn rastaımyz", - dedi Asqar Nııazov.
Eske salsaq, QR Prezıdenti Qasym-Jomart Toqaev qazaqstandyqtardyń borysh júktemesin jeńildetý týraly Jarlyqqa qol qoıǵan bolatyn.
