Eńbek mınıstrligi ekige bóline me

ASTANA. QazAqparat – Elimizde eńbek jáne halyqty áleýmettik qorǵaý mınıstrligi ekige bólinýi múmkin be? Bul saýalǵa OKQ-de ótken baspasóz máslıhatynda QR Eńbek jáne halyqty áleýmettik qorǵaý vıtse-mınıstri Erbol Ospanov jaýap berdi, dep habarlaıdy QazAqparat tilshisi.

«Qazir bul másele qaralyp jatqan joq. Jalpy halyqty eńbekpen qamtý jáne áleýmettik qorǵaý bir-birimen baılanysty. Mysaly, jumysshy óndiriste jaraqat alsa, aldymen onyń quqyǵyn qorǵaý kerek, ekinshiden densaýlyǵyna qaraı múgedektik mártebesin taǵaıyndaý múmkin bolady. Bul bir-birimen tyǵyz baılanysty protsess. Sondyqtan halyqty eńbekpen qamtý men áleýmettik qorǵaýdyń bir vedomstvoda bolǵany tıimdi dep oılaımyz», - dedi Erbol Ospanov tilshi saýalyna.

Eske salsaq, bıyl qyrkúıekte QR Parlamenti Májilisiniń depýtaty Erlan Smaıylov QR Eńbek jáne halyqty áleýmettik qorǵaý mınıstrligin eki vedomstvoǵa bólý ıdeıasyn usynǵan edi.

Depýtattyń aıtýynsha, atalǵan mınıstrlik eńbek quqyqtaryn qorǵaý men áleýmettik qorǵaý salasyndaǵy máselelerdi sheshýge kelgende múldem enjar.