Eńbek mınıstrligi biryńǵaı jıyntyq tólemge qatysty túsinik berdi
ASTANA. QazAqparat - QR Parlamenti Májilisinde QR Eńbek jáne halyqty áleýmettik qorǵaý vıtse-mınıstri Svetlana Jaqypova biryńǵaı jıyntyq tólemge qatysty túsinik berdi, dep habarlaıdy QazAqparat.
«Beıresmı jumyspen qamtylǵandardyń qyzmetin zańdastyrý úshin salyq organdarynda tirkelýdiń jeńil túrin kózdeıtin biryńǵaı jıyntyq tólem engizý josparlanyp otyr. Biryńǵaı jıyntyq tólemdi engizý beıresmı jumyspen qamtylǵandardyń qyzmetin tirkeýmen qatar, mindetti medıtsınalyq jáne áleýmettik saqtandyrý, zeınetaqymen qamsyzdandyrý júıelerine qatysýǵa múmkindik beredi. Bul rette, biryńǵaı jıyntyq tólemniń mólsheri bekitiledi, ıaǵnı ártúrli áleýmettik qorlarǵa jarnalardy óz betinshe esepteý qajet bolmaıdy», - dedi S. Jaqypova jumyspen qamtylý máselelerin retteıtin zań jobasyn tanystyrý barysynda.
Onyń sózine qaraǵanda, biryńǵaı jıyntyq tólemniń mólsheri respýblıkalyq mańyzy bar qalalarda, Astanada jáne oblystyq mańyzy bar qalalarda - 1 aılyq eseptik kórsetkish (2019 jyly - 2 525 teńge), basqa eldi mekenderde - 0,5 aılyq eseptik kórsetkish (2019 jyly - 1 263 teńge) kóleminde.
Biryńǵaı jıyntyq tólemdi engizý nátıjesinde beıresmı jumyspen qamtylǵandar qataryndaǵy 500 myń adamnyń qyzmetin formalızatsııalaý kózdeledi. Munymen qosa, 65,4 myń tóleýshi patent jáne ońaılatylǵan deklaratsııa negizinde qoldanystaǵy salyq rejiminen aýysady dep kútilýde.
«Biryńǵaı jıyntyq tólem tabys alý maqsatynda qyzmetti júzege asyratyn jeke tulǵalarǵa qoldanylady, alaıda olar: jaldamaly jumyskerlerdiń eńbegin paıdalanbaý; jeke tulǵalar úshin jumys isteý, qyzmet kórsetý; jeke tulǵalardyń tutynýy úshin jeke qosalqy sharýashylyqtan alynatyn aýyl sharýashylyǵy ónimderin satý sııaqty sharttardy saqtaýǵa tıis», - dedi Svetlana Jaqypova.
Biryńǵaı jıyntyq tólem: saýda obektilerin qosa alǵanda, kommertsııalyq jyljymaıtyn múlik obektileriniń aýmaǵynda qyzmet kórsetetin jeke tulǵalarǵa, turǵyn úıdi qospaǵanda, múlikti jalǵa beretin jeke tulǵalarǵa, jeke praktıkamen aınalysatyn adamdarǵa, oralmandardy qospaǵanda, sheteldikter men azamattyǵy joq adamdarǵa, dara kásipker retinde memlekettik tirkelgen adamdarǵa qoldanylmaıdy.
«Jalpy alǵanda, biryńǵaı jıyntyq tólemdi engizý beıresmı jumyspen qamtylǵandarǵa Mindetti áleýmettik medıtsınalyq saqtandyrý júıesine qatysýǵa jáne medıtsınalyq mekemelerdi tańdaý quqyǵymen quny men túrleri shektelmegen medıtsınalyq qyzmetterge qol jetkizýge múmkindik beredi. Budan bólek, jınaqtaýshy zeınetaqy júıesine qatysýǵa jáne júıege qatysý ótiline qaraı bazalyq zeınetaqy tólemin alýǵa jol ashady. Eńbek etý qabiletinen, asyraýshysynan aıyrylǵan jaǵdaıda, júktiligine jáne bosanýyna, bala asyrap alýyna, 1 jasqa deıingi balanyń kútimine baılanysty áleýmettik tólemder alýǵa múmkindikti qarastyrady», - dep túıdi vıtse-mınıstr.
Aıta keteıik, Biryńǵaı jıyntyq tólemdi 2019 jylǵy 1 qańtardan bastap 2023 jylǵy 31 jeltoqsanǵa deıin engizý josparlanǵan.
