Eńbek mınıstrligi áıelderdiń zeınet jasyn tómendetý týraly aqparat jalǵan ekenin habarlady
«Áıelderdiń zeınetke shyǵýynyń zańnamamen belgilengen jasy halyqaralyq jáne otandyq sarapshylar júrgizgen zertteýler nátıjeleri men uzaq merzimdi aktýarlyq boljamdarǵa negizdelgen, halyqaralyq praktıkaǵa jáne álemdegi qalyptasyp otyrǵan ekonomıkalyq jáne demografııalyq jaǵdaıǵa sáıkes keletinin esterińizge salamyz. Bekitilgen jas mólsheri bazalyq jáne yntymaqty zeınetaqyny jáne Biryńǵaı jınaqtaýshy zeınetaqy qorynan tólenetin tólemderdi eskere otyryp, qazaqstandyqtar qurmetti demalysqa shyqqannan keıin tıisti zeınetaqy tólemderin qalyptastyrý qajettiligimen negizdelgen.
Bul rette yntymaqty zeınetaqy júıesi birtindep qysqarýda, óıtkeni olardy taǵaıyndaý kezinde 1998 jylǵy 1 qańtarǵa deıin, ıaǵnı jınaqtaýshy júıe engizilgenge deıin ázirlengen eńbek ótili eskeriledi. Osyǵan baılanysty mindetti zeınetaqy jarnalary esebinen qalyptastyrylatyn jınaqtaýshy zeınetaqynyń róli artady, zeınetaqy jarnalaryn aýdarý kezeńi men mólsheri neǵurlym kóp bolsa, ol soǵan sáıkes joǵary bolady», - delingen resmı habarlamada.
Yntymaqty eńbek ótili joq jáne búginde jınaqtaýshy zeınetaqy júıesine qatyspaıtyn qazaqstandyqtar úshin 50+ jasynda erte zeınetke shyǵý laıyqty tólemderdi qamtamasyz etpeıdi.
Sonymen qatar qoldanystaǵy zańnamaǵa sáıkes azamattarǵa zeınetkerlikke erte shyǵý quqyǵy beriledi. Osylaısha, BJZQ-da zeınetaqy jınaqtary 55 jasqa (erler) jáne 52,5 jasqa (áıelder) tolǵanda jetkilikti bolǵan kezde qazaqstandyqtar zeınetaqy annýıtetin resimdeı alady (zeınetaqy jasyna jetkenge deıin zeınetaqy jınaqtarynan zeınetaqy tólemderin alý quqyǵy).
2021 jyldan bastap BJZQ salymshylarynyń keıinge qaldyrylǵan zeınetaqy annýıteti shartyn jasasý múmkindigi bar. ıAǵnı, áıelder ony 42,5 jasta, erler 45 jasta jasaı alady. Bul rette saqtandyrý uıymynan tólemder tıisinshe 52,5 jáne 55 jasta júzege asyryla bastaıdy.
Zııandy eńbek jaǵdaılarynda jumys isteıtin azamattar zeınetaqy annýıtetin 40 jastan paıdalana alady, bul rette osyndaı sharttar boıynsha tólemder 50 jastan bastalady.
2022 jyly QR Qarjy naryǵyn retteý jáne damytý agenttiginiń derekteri boıynsha erler úshin jedel zeınetaqy annýıtetiniń quny – 7,1 mln teńge, áıelder úshin – 9,5 mln teńge, erler úshin keıinge qaldyrylǵan zeınetaqy annýıtetiniń quny – 6,5 mln teńge, áıelder úshin – 8,1 mln teńge.
Azamattardan feıkterge nazar aýdarmaýdy jáne aqparatty tek resmı derekkózderden paıdalanýdy suraımyz.
Esterińizge sala keteıik, jalǵan aqparat taratý zań boıynsha jazalanady.
