Eńbek mınıstrligi 950 myńǵa jýyq adamǵa jumys taýyp bermek

ASTANA. QazAqparat – Eńbek mınıstrligi jyl aıaǵyna deıin 950 myńǵa jýyq adamdy jumysqa ornalastyrmaqshy. Bul týraly Eńbek jáne halyqtyń áleýmettik qorǵaý vıtse-mınıstri Oljas Ordabaev Ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

«Jyldyń basynda óńirlik jumyspen qamtý kartalary bekitildi. Sol karta boıynsha 950 myńǵa jýyq adamdy jumysqa ornalastyrý josparlanǵan. Onyń ishinde 231,3 myń adam sýbsıdııalanatyn jumys oryndaryna, 341,8 myń adam Memleket basshysynyń «10 myń halyqqa 100 jumys orny» bastamasy aıasynda, 320,4 myń adam jumys berýshiler usynǵan bos jumys oryndaryna ornalastyrý kózdelip otyr», - dedi vıtse-mınıstr.

Onyń aıtýyna qaraǵanda, qazirdiń ózinde atalǵan baǵyttar boıynsha 117 myńnan astam azamat jumysqa turǵan.

Ortalyq kommýnıkatsııalar qyzmetinde ótken brıfıngide mınıstrlik ókilderi eldegi jumyssyzdardyń naqty sanyn aıtty. Resmı statıstıka derekteri boıynsha, elimizde 456 myń jumyssyz tulǵa, 2,1 mln ózin-ózi jumyspen qamtýshy bar.