Eńbek mınıstrligi 7 myńnan astam salalyq kásiptik standarttardy ázirleýde
ASTANA. 7 jeltoqsan. QazAqparat - Qazaqstannyń Eńbek jáne halyqty áleýmettik qorǵaý mınıstrligi Ulttyq biliktilik júıesiniń aıasynda 7 myńnan astam salalyq kásiptik standarttardy ázirleý jumysyn júrgizýde.
Bul týraly búgin «Kásiptik bilim jáne bıznes: áriptester dıalogy» IV halyqaralyq forýmynda sóılegen sózinde Eńbek jáne halyqty áleýmettik qorǵaý vıtse-mınıstri Erǵalı Egemberdi aıtty, dep habarlaıdy primeminister.kz saıty.
«QR Eńbek jáne halyqty áleýmettik qorǵaý mınıstrligi salalyq organdarmen birlese otyryp, ekonomıkalyq qyzmettiń 21 túri boıynsha Ulttyq biliktilik júıesiniń 7 myńǵa jýyq kásiptik standarttaryn ázirleýde», - dedi E.Egemberdi.
Vıtse-mınıstrdiń aıtýynsha, Ulttyq biliktilik júıesin qurý jumysynyń aıasynda eki deńgeıli dıalog alańy qurylyp otyr. Onda mınıstrlikter men memlekettik organdardyń mamandary júıeniń aǵymdaǵy ahýalyn baǵalaýmen jáne jańa Ulttyq biliktilik júıesin qurýmen, UBJ modeliniń negizdi problemalaryn, táýekelderi men damý perspektıvalaryn anyqtaýmen aınalysýda.
Esterińizge sala keteıik, Astanada «Kásiptik bilim jáne bıznes: áriptester dıalogy» IV halyqaralyq forýmy ótýde. Onda bıznes-qurylymdarmen yntymaqtastyq aıasynda kásiptik bilimdi damytýdyń joldary men perspektıvasy talqylanýda. Forým aıasynda sondaı-aq, Tehnıkalyq jáne kásiptik bilim berý júıesi oqý mekemeleriniń ınnovatsııalyq jabdyqtar men qyzmetter kórmesi ótýde.
Forýmǵa QR Prezıdenti Ákimshiliginiń, QR Úkimetiniń ókilderi, QR Parlamentiniń depýtattary, salalyq vedomstvolar men mınıstrlikterdiń, salalyq jáne óńirlik TjKB mekemeleriniń, kásiptik qaýymdastyqtar men TjKB oqý mekemeleriniń basshylary, Eýropa men Azııanyń 11 elinen halyqaralyq uıymdar ókilderi qatysýda.
Osy forým barysynda QR Bilim jáne ǵylym vıtse-mınıstri Saıat Shaıahmetov Ulttyq biliktilik júıesi qazaqstandyqtardyń kásibı jınaqylyǵyn qaı jaǵynan bolsa da damytýǵa yqpal etetinin aıtty.
«Ulttyq biliktilik júıesi qoldanylyp júrgen ártúrli deńgeıdegi jáne tıptegi biliktilikterdi birtutas qyp baılanystyrady. Ol biliktilikti resmı taný arqyly azamattardyń kásibı jınaqylyǵynyń barlyq jaǵynan damýyna yqpal etedi», - dedi S.Shaıahmetov.
Sondaı-aq ol Ulttyq biliktilik júıesi tetigin engizý azamattarǵa ómiriniń barlyq kezeńinde, ári ózine qolaıly ýaqytta oqýǵa múmkindik jasaıdy dep atap ótti.
Sonymen qatar vıtse- mınıstr UBJ qurý máselesinde Búkilálemdik bank nesıesi esebinen júzege asatyn «KjTB jańǵyrtý» jobasy men EO «KjTB qoldaý kórsetý» jobasy mańyzdy ról oınaıtynyn jetkizdi.
Atalǵan jobalardyń sarapshylary ulttyq biliktilik júıesiniń tujyrymdamasyn, biliktiliktiń salalyq sheńberin ázirleýdiń sulbasy men ádistemesin, kásibı standarttardy ázirleýdiń ádistemesi men sulbasyn, sondaı-aq ekonomıkanyń birqatar sektorlaryna arnalǵan kásibı standarttardy ázirledi.
