Eńbek mınıstrligi 352,6 myń qazaqstandyqty jumysqa ornalastyrýǵa kómektesti

Osy jylǵy 1 maýsymdaǵy jaǵdaı boıynsha 2021 - 2025 jyldarǵa arnalǵan Kásipkerlikti damytý jónindegi ulttyq jobaǵa 352,6 myń adam qatysty. 233,1 myń adam jumysqa ornalasty, onyń 100,1 myńy turaqty jumysqa ornalasqan dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Sýbsıdııalanatyn jumys oryndaryna 133 myń adam ornalastyryldy. Onyń ishinde áleýmettik jumys oryndarymen 14,6 myń adam, jastar praktıkasymen 8,6 myń adam, qoǵamdyq jumystarmen 94,8 myń adam, «Alǵashqy jumys orny» jobasy aıasynda 3,9 myń adam, «Urpaqtar kelisimsharty» jobasy aıasynda 140 adam, «Kúmis jas» jobasy aıasynda 11 myń adam jumyspen qamtyldy.

Eńbek naryǵynda suranysqa ıe daǵdylar boıynsha onlaın oqytýmen 25,2 myń jumyssyz adam qamtyldy. Onyń ishinde 22,8 myńy oqýyn aıaqtaǵan.

Sondaı-aq, «Bastaý Bıznes» jobasy boıynsha kásipkerlik negizderine oqytýmen 88,3 myń adam qamtyldy, onyń ishinde 66,7 myń adam oqýdy aıaqtap, sertıfıkattar aldy.

Qyzmet salasyn tańdaý maqsatynda 64,7 myń adam áleýmettik kásiptik baǵdarlaýdan ótti.

Budan basqa, 2023 jyly Ulttyq joba sheńberinde 400 AEK (1 380 000 teńge) mólsherinde jańa bıznes-bastamalardy iske asyrý úshin 9 myń grant berý kózdelgen. Jyl basynan beri 2615 grant berildi.