Eńbek mınıstrligi 22 memqyzmetti elektrondyq jáne belsendi formatqa aýystyrady
NUR-SULTAN. QazAqparat - Qazaqstanda 22 memlekettik qyzmet elektrondyq jáne belsendi formatqa aýystyrylady. Bul týraly búgin halyqpen eseptik kezdesý ótkizgen QR Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.
Onyń aıtýynsha, búgingi tańda Eńbek mınıstrliginiń 38 memlekettik qyzmetiniń 12-si elektrondyq formatta, 3-eýi belsendi, 7-eýi qyzmet kompozıtti nemese keshendi túrde kórsetiledi. Máselen, bala týýyna baılanysty járdemaqy taǵaıyndaý boıynsha qyzmetter ótinishsiz nemese belsendi kórsetiledi. Barlyq zeınetaqy tólemderi bir ótinish boıynsha keshendi nemese kompozıtti taǵaıyndalady.
«Elbasy Qazaqstan halqyna Joldaýynda elektrondyq memlekettik qyzmetterdiń úlesin 2019 jyly - 80, 2020 jyly 90 paıyzǵa jetkizýdi mindettedi. 2019 jyly elektrondyq jáne belsendi formatqa áleýmettik-eńbek salasynyń taǵy 22 memlekettik qyzmeti kóshiriledi» - dep atap ótti mınıstr.
Sondaı-aq vedomstvo basshysynyń dereginshe, 2019 jyldyń 1 shildesine deıin memlekettik qoldaýǵa muqtaj otbasylardyń tizimin kórýge múmkindik beretin otbasylardyń áleýmettik kartalary qalyptastyrylatyn bolady. Bul bolashaqta memlekettik qyzmetterdi belsendi kórsetýge múmkindik beredi. Eńbek salasynda azamattardyń eńbek quqyqtaryn qorǵaýǵa yqpal etetin elektrondyq eńbek sharttary júıesin engizý jónindegi tsıfrlyq jobany iske asyrý jalǵastyrylady.
«Áleýmettik salada jumys isteıtinderdiń barlyǵy bul qarapaıym qaıta qurýlar emes, ár qazaqstandyqqa, ár otbasyna qatysty qaıta qurýlar ekenin túsinýi tıis. Bul bizden tıisti qaıtarym men jeke kózqarasty talap etedi. Bizdiń jalǵyz ǵana maqsatymyz - barlyq qazaqstandyqtardyń ál-aýqatyn arttyrý men ómir súrý sapasyn jaqsartý», - dedi Berdibek Saparbaev.
