Eńbek mınıstrligi jumysqa ornalasý jáne bos jumys oryndaryn jarııalaý tártibin túsindirdi

Eńbek jáne halyqty áleýmettik qorǵaý mınıstrligi jumys berýshilerdiń bos jumys oryndary týraly málimetterdi jarııalaý tártibin, sondaı-aq azamattardyń jumysqa ornalasýyn esepke alý jáne olardy jumyssyz retinde esepten shyǵarý tetigin túsindiredi.

— Zańnamaǵa sáıkes, jumys berýshiler barlyq bos jumys orny týraly málimetti olar paıda bolǵan kúnnen bastap bes jumys kúni ishinde Elektrondyq eńbek bırjasy Enbek.kz saıtyna ornalastyrýǵa mindetti. Bul rette bos jumys orny qyzmetkerdi resmı túrde jumysqa qabyldaǵanǵa deıin jarııalanýy kerek.

Belgilengen tártiptiń saqtalýy bos jumys oryndary týraly aqparattyń ózekti bolýyn qamtamasyz etedi. Biryńǵaı tsıfrlyq platforma azamattarǵa qoljetimdi jumys oryndary jónindegi málimetterdi usynady, — delingen mınıstrlik habarlamasynda.

Bos jumys oryndaryn belgilengen merzimde jarııalamaǵany, sondaı-aq aldaǵy ýaqytta qyzmetkerlerdiń jumystan bosatylatyny týraly málimetti usynbaǵany úshin ákimshilik jaýapkershilik qarastyrylǵan. Zań buzýdyń sıpaty men qaıtalanýyna qaraı eskertý jasalady, al qaıtalanǵan jaǵdaıda aıyppul salynady.

Mınıstrlik jumyssyz retinde esepte turǵan azamattardyń jumysqa ornalasýyn esepke alý tártibine de erekshe nazar aýdarady. Qazaqstanda atalǵan úderis avtomattandyrylǵan túrde memlekettik aqparattyq júıelerdiń ózara yqpaldastyǵy negizinde iske asyrylady.

— Jumysqa ornalasqan jaǵdaıda, bes jumys kúni ishinde mansap ortalyǵyna tıisti aqparat berýge mindetti. Alaıda azamattyń mansap ortalyǵyna habarlaspaýy onyń mártebesin jańartýǵa kedergi bolmaıdy.

Atap aıtqanda, azamatty esepten avtomatty túrde shyǵarýǵa Eńbek sharttaryn esepke alýdyń biryńǵaı júıesinde elektrondyq eńbek shartynyń tirkelýi nemese jumys berýshiniń alǵashqy mindetti zeınetaqy jarnasyn aýdarýy negiz bolýy múmkin.

Osylaısha, jumysqa ornalasqany týraly málimet belgilengen tártippen memlekettik aqparattyq júıelerge tússe, oǵan qosymsha mansap ortalyǵyna baryp, esepten shyǵý úshin ótinish berýdiń qajeti joq, — delingen habarlamada.

Eńbek mınıstrligi jumys berýshilerdi qyzmetkerdi jumysqa qabyldaý kezinde zańda belgilengen talaptardy saqtaýǵa shaqyrady. Atap aıtqanda, bos jumys oryndaryn Enbek.kz saıtyna ýaqytynda jarııalap, qyzmetker jumysqa qabyldanǵan kezde elektrondy eńbek shartyn tirkeý jáne mindetti áleýmettik ári zeınetaqy aýdarymdaryn ýaqytyly júrgizý qajet.

Talaptardyń tıisti deńgeıde oryndalýy eńbek qatynastary týraly aqparattyń anyqtyǵy men ózektiligin qamtamasyz etip, jumyssyz azamattardy qoldaý tetikteriniń tıimdi iske asýyna negiz bolady. 

Aıta ketelik avtorlyq quqyq salasyndaǵy Biryńǵaı tsıfrlyq platforma qalaı jumys isteıtini týraly jazǵan edik.