Eńbek mınıstrligi jumys berýshiler tarapynan oryn alatyn zań buzýshylyqtardy atady
ASTANA. KAZINFORM – Eńbek zańnamasyn buzǵan jumys berýshilerge 2,9 myńnan astam ákimshilik aıyppul salyndy. Bul týraly Aqmádı Sarbasov Eńbek jáne halyqty áleýmettik qorǵaý birinshi vıtse-mınıstri aıtty.
Ortalyq komýnıkatsııalar qyzmetindegi brıfıngte vıtse-mınıstr jyl basynan beri eńbek ınspektorlary jumyskerlerdiń quqyqtarynyń saqtalýyna memlekettik baqylaýdy kúsheıtkenin aıtty.
«Jumys berýshilerdi tekserý jáne anyqtalǵan buzýshylyqtar sany 8 paıyzǵa artty. Eńbek zańnamasyn buzǵan jumys berýshilerge 2,9 myńnan astam ákimshilik aıyppul salyndy. Jumys berýshiler tarapynan negizgi buzýshylyqtar - eńbek sharttaryn jasaspaý, zańsyz jumystan shyǵarý, jalaqyny ýaqtyly tólemeý bóliginde jumyskerlerdiń quqyqtaryn buzý», - dedi ol.
Aqmádı Sarbasovtiń málimetinshe, osy jyldyń basynan beri memlekettik eńbek ınspektorlary 259 kásiporynda 15 myńǵa jýyq jumyskerdiń aldynda 3,3 mlrd teńge somasynda jalaqy boıynsha bereshek anyqtady. Qabyldanǵan sharalardyń arqasynda 13,2 myńnan astam jumyskerdiń quqyqtary qorǵaldy, olarǵa 2,6 mlrd teńge tólendi.
