Eńbek mınıstrligi: Jetkilikti shekti kóterý qazaqstandyqtardyń bolashaq zeınetaqysyn qorǵaýǵa baǵyttalǵan
ASTANA. KAZINFORM – Qazaqstanda zeınetaqy jınaqtaryn merziminen buryn paıdalaný kezinde qoldanylatyn eń tómengi jetkiliktilik sheginiń parametrleri jańartyldy. Ózgerister salymshynyń qazirgi jasyn ǵana emes, onyń zeınetkerlik jasqa deıingi kezeńin, bolashaq zeınetaqy tólemderin, ınvestıtsııalyq kiristi jáne ózge de uzaq merzimdi faktorlardy eskeretin neǵurlym dál esepteý ádistemesin engizýge baılanysty qabyldandy.
Eńbek jáne halyqty áleýmettik qorǵaý mınıstrligi málimetinshe, zeınetaqy jınaqtarynyń eń tómengi jetkiliktilik shegin jańartý eń aldymen salymshylardyń uzaq merzimdi múddelerin qorǵaýǵa baǵyttalǵan. Óıtkeni zeınetaqy jınaqtary – qarapaıym depozıt nemese kúndelikti shyǵyndarǵa jumsalatyn qarjy kózi emes. Onyń negizgi maqsaty – azamattardy zeınetkerlik jasqa jetkennen keıin turaqty tabyspen qamtamasyz etý.
- Mınıstrlik zeınetaqy qarajaty eń aldymen azamattardyń bolashaqtaǵy zeınetaqy tólemderine qyzmet etýi tıis degen ustanymdy basshylyqqa alady. Sebebi búgin jınaqty merziminen buryn paıdalaný erteńgi zeınetaqy tólemderiniń kólemine tikeleı áser etýi múmkin. Sonymen qatar zeınetaqy jınaqtarynyń bir bóligin balama maqsattarǵa (turǵyn úı men emdelý) paıdalaný múmkindigi saqtalady. Zeınetaqy mólsheri burynǵy tabysynyń keminde 40%-yn quraıtyn zeınetkerler turǵyn úı men emdelý qajettilikteri úshin jınaqtarynyń 50%-yna deıin paıdalana alady. Al memleketten eńbek sińirgen jyldary úshin zeınetaqy tólemderin alatyn azamattar zeınetaqy shotyndaǵy qalǵan qarajatty tolyq kólemde paıdalaný quqyǵyna ıe, - delingen mınıstrlik habarlamasynda.
Aıta ketý kerek, jetkiliktilik shekteri sońǵy úsh jyl ishinde qaıta qaralmaǵan. Sondyqtan olardy jańartý zeınetaqy júıesiniń uzaq merzimdi turaqtylyǵyn qamtamasyz etýge jáne azamattardyń bolashaqta neǵurlym qorǵalǵan ári turaqty tabysqa senim artýyna múmkindik beredi.
Zeınetaqy jınaqtary – adamnyń zeınet jasyndaǵy qarjylyq turaqtylyǵynyń kepili. Jańartylǵan ádisteme qazaqstandyqtardyń bolashaqtaǵy zeınetaqy tólemderin qorǵaýǵa, jınaqtardyń jetkiliksiz bolý táýekelderin tómendetýge jáne uzaq merzimdi qarjylyq josparlaý mádenıetin qalyptastyrýǵa baǵyttalǵan.
Zeınetaqy jınaǵynyń 2026 jylǵy eń tómengi jetkilikti shegi jarııalanǵanyn jazǵan edik.
