Eńbek mınıstrligi zeınetaqy júıesin jetildirý boıynsha jumys tobyn qurdy
ASTANA. KAZINFORM — Eńbek mınıstrligi zeınetaqy júıesiniń qarjylyq turaqtylyǵyn nyǵaıtý tásilderin talqylap jatyr.
Memleket basshysynyń zeınetaqy júıesiniń uzaq merzimdi qarjylyq turaqtylyǵyn qamtamasyz etý jáne azamattardy zeınetaqymen qamsyzdandyrý deńgeıin arttyrý jónindegi tapsyrmalaryn iske asyrý aıasynda QR Eńbek jáne halyqty áleýmettik qorǵaý mınıstrligi memlekettik organdardyń, sarapshylar qaýymdastyǵynyń jáne beıindi uıymdardyń ókilderi qatysatyn arnaıy jumys tobyn qurdy.
Zeınetaqy júıesin jetildirý jónindegi jumys tobynyń qyzmetin jalǵastyrý maqsatynda QR Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen sarapshylar qaýymdastyǵy jáne úkimettik emes sektor ókilderiniń qatysýymen keńeıtilgen keńes ótti. Kezdesý barysynda qoǵamdyq uıymdardyń ókilderi zeınetaqy júıesin jańǵyrtýǵa qatysty usynylǵan tujyrymdamalyq tásilderdi jan-jaqty talqylady. Keńeske qatysýshylar áleýmettik kepildikter, azamattardyń ártúrli sanattary úshin tólemderdiń jetkilikti deńgeıin qamtamasyz etý máselelerin jáne uzaq merzimdi demografııalyq úrdisterdi eskerý qajettiligin alǵa tartty.
Jumys tobynyń qyzmeti sheńberinde sarapshylar men beıindi ınstıtýttar júıeni jańǵyrtýǵa baǵyttalǵan birqatar tujyrymdamalyq tásildi usyndy. Olardyń árqaısysy zeınetaqy júıesiniń tıimdiligin arttyrýǵa baǵyttalǵan.
Atap aıtqanda, Memlekettik áleýmettik saqtandyrý qory medıanalyq jalaqyǵa qatysty ortasha aılyq tabys pen júıege qatysý eńbek ótiline negizdelgen áleýmettik zeınetaqy tólemi júıesin engizý tásilin usyndy. Bul model tek jınaqtaýshy júıege tán táýekelderdi azaıtyp, tólemderdiń yntymaqtastyq jáne boljamdylyq qaǵıdattaryn engizýge baǵyttalǵan.
Biryńǵaı jınaqtaýshy zeınetaqy qory jumys berýshi jarnalarynyń 4%-yn azamattyń jeke zeınetaqy shotyna, al 1%-yn yntymaqty (saqtandyrý) quramdas bólikke aýdarýdy kózdeıtin modeldi tanystyrdy. Bul sheshim azamattarǵa ómir súrý uzaqtyǵyna qaramastan ómir boıy qarjylyq qoldaý kórsetip, uzaq merzimdi kezeńde turaqty tólemderdi qamtamasyz etýge múmkindik beredi.
Budan bólek, QR Parlamenti Senatynyń depýtaty Amangeldi Nuǵmanovtyń uzaq jyldar boıy eńbek etken azamattardy qoldaýǵa baǵyttalǵan usynysy da talqylandy. Atap aıtqanda, 40 jyl eńbek ótili bar azamattar úshin, ásirese bıýdjet salasy qyzmetkerlerine qatysty, zeınetke shyǵý ýaqytyn ıkemdi retteý múmkindigin qarastyrý usynylǵan.
Atalǵan tásilderdi talqylaýǵa bedeldi sarapshylar, onyń ishinde BUU janyndaǵy Astanadaǵy memlekettik qyzmet haby Basqarýshy komıtetiniń tóraǵasy Álıhan Baımenov, sondaı-aq Bolat Jámishev, Oraz Jandosov pen Elena Bahmýtova qatysyp jatyr.
EHÁQM-de usynylǵan bastamalardyń barlyǵy qazir talqylaý satysynda ekenin jáne konsýltatıvtik-usynymdyq sıpatqa ıe ekenin atap ótý kerek. Mınıstr Asqarbek Ertaevtyń pikirinshe, azamattyq qoǵam ınstıtýttarynyń talqylaý protsesine belsendi qatysýy salmaqty ári áleýmettik baǵdarlanǵan sheshimder qabyldaýdyń mańyzdy sharty sanalady. Zeınetaqy júıesin odan ári reformalaý jónindegi túpkilikti sheshimder qarjylyq turaqtylyqty, áleýmettik tıimdilikti jáne azamattar úshin yqtımal saldardy jan-jaqty baǵalaý nátıjeleri boıynsha qabyldanady.
— Mınıstrliktiń basty basymdyǵy — azamattarǵa zeınet jasyna jetkennen keıin uzaq merzimdi perspektıvada laıyqty ómir súrý deńgeıin qamtamasyz ete alatyn turaqty ári teńgerimdi zeınetaqy júıesin qalyptastyrý. Túsken barlyq usynystyń qarjylyq negizdiligi, áleýmettik ádilettiligi jáne praktıkalyq iske asyrylý múmkindigi qarastyrylady, — dep atap ótti Áleýmettik qamsyzdandyrý jáne áleýmettik saqtandyrý departamentiniń dırektory Dınara Qaırolla.
Qazaqstanda zeınetaqymen qamsyzdandyrý júıesin jetildirý boıynsha keshendi sharalar qazirdiń ózinde júzege asyrylyp jatqanyn aıta ketý kerek. Atap aıtqanda, 2026 jylǵy 1 qańtardan bastap bazalyq jáne yntymaqty zeınetaqy mólsheri 10%-ǵa ındeksteldi.
Sonymen qatar bıyl bazalyq zeınetaqynyń eń joǵary mólsheri kúnkóris deńgeıiniń 110%-ynan 118%-yna deıin ulǵaıtyldy, al 2027 jyly bul kórsetkish kúnkóris deńgeıiniń 120%-yna deıin jetkiziledi.
Budan bólek, jumys berýshilerdiń mindetti zeınetaqy jarnalarynyń mólsherlemelerin kezeń-kezeńimen arttyrý jalǵasady: 2026 jyly olardyń mólsheri qyzmetker tabysynyń 3,5%-yn quraıdy, al 2028 jylǵa qaraı 5%-ǵa deıin ulǵaıtylady.
Osyǵan deıin Eńbek jáne halyqty áleýmettik qorǵaý mınıstrligi basqa vedomstvolarmen birlesip, zeınetaqy júıesin reformalaýdyń eki modelin qarastyryp jatqanyn jazǵan edik. Bul máselege qatysty ortaq ustanym Úkimetke shilde aıynyń basynda usynylmaq.
