Eńbek mınıstrligi zeınetaqy jınaqtaryna memlekettik kepildikke qatysty túsinikteme berdi
ASTANA. KAZINFORM — Mınıstrlik zeınetaqy aktıvterin basqarý júıesi burynǵydaı kópdeńgeıli memlekettik baqylaýda bolatynyn aıtty.
Áleýmettik jeliler men buqaralyq aqparat quraldarynda 2003 jyldan beri qoldanylyp kelgen zeınetaqy jınaqtary boıynsha memlekettik kepildikti alyp tastaýǵa qatysty norma keńinen talqylanyp jatyr. Osyǵan baılanysty Eńbek jáne halyqty áleýmettik qorǵaý mınıstrligi túsinikteme berdi.
— Tarıhı turǵydan alǵanda, memlekettik kepildik ınstıtýty azamattardyń ózderiniń zeınetaqy jınaqtaryn ınvestıtsııalaý strategııasyna derbes yqpal etý múmkindigi bolmaǵan kezeńde engizildi. Memleket ınvestıtsııalyq saıasatty aıqyndap, salymshylardyń óz qarajatyn basqarý quqyǵyn shektegendikten, naqty ınvestıtsııalyq tabystylyq pen ınflıatsııa deńgeıi arasyndaǵy aıyrmany óteý jónindegi mindettemeni óz moınyna alǵan bolatyn, — delingen mınıstrlik habarlamasynda.
Qazirgi tańda salymshylarǵa ınvestıtsııalyq basqarýshy kompanııany jáne ınvestıtsııalyq strategııany óz betinshe tańdaý quqyǵy berilgendikten, memlekettik kepildiktiń bastapqy quqyqtyq ári ekonomıkalyq negizdemesi ózektiligin joǵaltady.
— Basqarýshyny óz qalaýymen tańdaǵan salymshy kútiletin tabystylyqty, táýekelderdi jáne aktıvterdi basqarý sharttaryn ózi baǵalap, ınvestıtsııalyq sheshimdi derbes qabyldaıdy. Mundaı jaǵdaıda salymshynyń ózi qabyldaǵan ınvestıtsııalyq sheshimderdiń nátıjesi úshin memleketke ótemaqy tóleý mindetin júkteý memlekettik resýrstardy ádil paıdalaný qaǵıdattaryna sáıkes kelmeıdi.
Sonymen qatar memlekettik kepildik birjolǵy ótemaqy sıpatynda beriletinin jáne uzaq merzimdi perspektıvada turaqty zeınetaqy tólemderiniń mólsherine áser etpeıtinin eskergen jón. Sondyqtan atalǵan kepildiktiń saqtalýy zeınetaqymen qamsyzdandyrýdyń jetkilikti deńgeıin qamtamasyz etetin negizgi faktor bolyp tabylmaıdy, — delingen habarlamada.
Mınıstrlik zeınetaqy aktıvterin basqarý júıesi burynǵydaı kópdeńgeıli memlekettik baqylaýda bolatynyn aıtty.
— Sonymen birge usynylyp otyrǵan ózgerister memlekettiń zeınetaqy jınaqtarynyń saqtalýyna qatysty jaýapkershilikten bas tartatynyn bildirmeıdi. Zeınetaqy aktıvterin basqarý júıesi burynǵydaı kópdeńgeıli memlekettik baqylaýda bolady, — delingen habarlamada.
Aıta ketelik zeınetaqy júıesiniń taǵy bir modeli pysyqtalyp jatqany týraly jazǵan edik.
