Eńbek mınıstrligi zeınetaqy jınaqtaryn alý erejesine ózgeris engizýge qatysty túsinik berdi
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Vıktorııa Shegaı zeınetaqy jınaǵyn alý úshin eń tómengi jetkilikti sheginiń somasyn esepteýdi ózgertýge qatysty túsinik berdi.
Onyń aıtýynsha, esepteýdiń jańa ádistemesi áli bekitilmegen.
— Ósimniń qansha bolatynyn ázirge aıta almaımyz. Ózderińiz bilesizder, bıyl shekti mánder kóterildi. Áleýmettik kodekske sáıkes, jańa kúntizbelik jyl bastalǵanǵa deıin bir aıdan keshiktirmeı jetkilikti shegi BJZQ saıtynda jarııalanýy tıis, - dedi V. Shegaı.
Vıtse-mınıstrdiń aıtýynsha, jastardyń zeınetaqy jınaqtaryn qarqyndy túrde sheship alýy olardyń bolashaq zeınetaqylaryna keri áser etýi múmkin. Keıingi bes jylda qazaqstandyqtar 5 trln teńgeden astam qarajatty shyǵarǵan.
Osyǵan baılanysty, mınıstrlik bolashaqta zeınetaqy tólemderiniń joǵarylaýyn qamtamasyz etý úshin jınaqtardy merziminen buryn alý tásilin qaıta qaraýdy josparlady.
— Bul statıstıka bizdi alańdatyp otyr. Sondyqtan, usynylǵan tásilder aıasynda qarastyrylatyn ıdeologııa bolashaq zeınetkerlerdiń zeınetaqysyn joǵarylatýǵa baǵyttalǵan, - dedi ol.
Zeınetaqy jınaqtaryndaǵy artyq qarajatty esepteý úshin qarastyrylatyn quraldardyń biri - zeınetaqy annýıteti mehanızmin damytý.
Budan buryn habarlanǵandaı, mindetti zeınetaqy jarnalary esebinen jınalǵan zeınetaqy tólemderin júzege asyrý tártibine jáne zeınetaqy jınaǵynyń eń tómen jetkilikti shegin aıqyndaý ádistemesine ózgerister men tolyqtyrýlar engizilmek. QR Úkimeti qaýlysynyń jobasy zeınetaqy jınaǵynyń eń tómen jetkilikti shegin belgileý mehanızmin jetildirýdi maqsat etedi.
Aıta keteıik, buǵan deıin depýtat eńbek ótili negizindegi zeınetaqy úlgisine kóshýdi usynǵanyn jazǵanbyz.
