Eńbek mınıstrligi tehnıkalyq ınspektorlardyń ókilettigin keńeıtti
ASTANA. KAZINFORM — Eńbek mınıstrligi tehnıkalyq ınspektorlardyń ókilettigin keńeıtip, eńbek qaýipsizdigine baqylaýdy kúsheıtedi.
QR Eńbek jáne halyqty áleýmettik qorǵaý mınıstrligi azamattardyń eńbek quqyqtarynyń saqtalýyn baqylaý júıesin qaıta quryp jatyr. Mınıstr Asqarbek Ertaevtyń tóraǵalyǵymen ótken apparattyq keńeste Memlekettik eńbek ınspektsııasy komıtetiniń I toqsandaǵy jumys qorytyndysy shyǵarylyp, jumyskerlerdi qorǵaýdyń jańa tetikteri aıqyndaldy.
Bıylǵy birinshi toqsanda memlekettik ınspektorlar 17,5 myń jumyskerdiń quqyǵyn qorǵap, josyqsyz jumys berýshilerden 452 mıllıon teńge jalaqy bereshegin óndirip aldy.
Óndiristik jaraqattanýdyń aldyn alý maqsatynda vedomstvo qorǵaýdyń jańa tetikterin iske qosyp jatyr. Birinshi kezekte qoǵamdyq baqylaý quraldary keńeıtiledi. QR Parlamentiniń qaraýyna tıisti Zańǵa túzetýler joldandy, sonyń arqasynda tehnıkalyq ınspektorlar aqparatty óz betinshe suratýǵa, jumys oryndaryna tekserý júrgizýge jáne memlekettik organdarmen teń dárejede tergep-tekserýlerge qatysýǵa zańdy quqyq alady.
Sonymen qatar Eńbek mınıstrligi kásiporyndardaǵy óndiristik keńester jumysynyń biryńǵaı qaǵıdalaryn engizedi — olar apattar oryn alǵanǵa deıin táýekelderdi anyqtaý úshin qatań túrde parıtettik negizde (jumys berýshilerden, jumyskerlerden jáne kásipodaqtardan) qurylatyn bolady. Budan bólek jaraqattardy jasyrý faktilerin tolyq joıý úshin vedomstvo ІІM-men birlesip derekter almasý algorıtmin ázirlep jatyr, bul jazataıym oqıǵa boıynsha árbir materıaldyń protsestik sheshim qabyldanǵanǵa deıin ashyq baqylaýda bolýyn qamtamasyz etedi.
Azamattardyń quqyqtaryn qorǵaýdyń tsıfrlyq quraldaryn kúsheıtý de mańyzdy qadam bolmaq. Mınıstr A. Ertaev júıe problemaly kásiporyndardy naqty ýaqyt rejıminde qadaǵalap otyrýy úshin «Eńbek táýekelderiniń kartasyn» basqa memlekettik organdardyń bazalarymen tolyq ıntegratsııalaý mindetin qoıdy.
— Eńbek táýekelderiniń kartasy jaı ǵana tizim bolmaýy tıis. Ol biz jedel áreket etip, adamdardyń quqyqtaryn qorǵaý úshin jalaqyny keshiktiretin problemaly kásiporyndardy naqty ýaqyt rejıminde kórsetýi kerek. Tsıfrlyq jumyspen qamtý jáne baqylaý quraldary aldyn alý baǵytynda jumys isteýi tıis, — dedi vedomstvo basshysy.
Osyndaı jańashyldyq Tsıfrlyq jumyspen qamtý qyzmetinde de (Enbek.kz) kútiledi. Keńeste mınıstr negizgi baǵytty belgiledi — servıs bos jumys oryndaryn jaı ǵana irikteýden jumys izdegenderdi proaktıvti jeke súıemeldeýge kóshýi tıis.
Osydan buryn Eńbek mınıstrligi elimizdiń zeınetaqy júıesinde oryn alýy múmkin ózgeristerge qatysty pikir bildirdi.
