Eńbek mınıstrligi Ońtústik Koreıada zańsyz júrgen qazaqstandyqtarǵa eskertý jasady
ASTANA. KAZINFORM - QR Eńbek jáne halyqty áleýmettik qorǵaý mınıstrligi Koreıa Respýblıkasynda zańsyz eńbek etip júrgen qazaqstandyqtar 2026 jylǵy aqpan aıynyń sońyna deıin aıyppul salynbaı jáne qaıta kirýge tyıym salynbaı, elden erikti túrde shyǵa alatynyn eske salady.
Mınıstrliktiń baspasóz qyzmetiniń habarlaýynsha, buǵan deıin habarlanǵandaı, erikti túrde elden shyǵý baǵdarlamasynyń (budan ári – Baǵdarlama) ýaqytsha sheńberin keńeıtý jónindegi ýaǵdalastyqtar 2025 jyly ótken zańsyz kóshi-qondy azaıtý jáne azamattarymyzdyń quqyqtaryn qorǵaý máseleleri boıynsha kelissózder barysynda Qazaqstan Respýblıkasy Eńbek jáne halyqty áleýmettik qorǵaý mınıstrligi (budan ári – EHÁQM) men Koreıa Respýblıkasy Ádilet mınıstrligi arasynda qol jetkizilgen.
Bul sharalar quqyqtyq saldarlardy jeńildetýge jáne óz mártebesin retteýge daıyn adamdardy qoldaýǵa baǵyttalǵan. Baǵdarlama qylmystyq quqyqbuzýshylyq jasaǵan, májbúrlep shyǵarý sharasyna jatatyn, sondaı-aq 2025 jylǵy 1 jeltoqsannan keıin zańsyz mártebege túsken sheteldikterge qoldanylmaıdy.
Baǵdarlamaǵa qatysý úshin tólqujat, óz erkimen ketý týraly ótinish jáne áýe bıleti qajet. Aldyn ala habarlama Koreıa Respýblıkasynyń ımmıgratsııa keńseleri arqyly ushý kúnine deıin 15-ten 3 kúnge deıingi merzimde beriledi.
EHÁQM qazaqstandyqtardy shetelde tek zańdy negizde jumysqa ornalasýǵa shaqyrady. Bul zańsyz kóshi-qon, elden shyǵaryp jiberý, aıyppuldar, quqyqtyq shekteýler jáne eńbek qanaýy sııaqty táýekelderdiń aldyn alýǵa múmkindik beredi.
-Tek resmı jáne tekserilgen eńbek resýrstary arnalaryna júginý qajet: lıtsenzııalanǵan jeke jumyspen qamtý agenttikteri, memlekettik baǵdarlamalar jáne jumys berýshilerdiń resmı usynystary. EHÁQM shetelde jumys istep júrgen Qazaqstan azamattarynyń quqyqtaryn qorǵaý boıynsha júıeli jumysty jalǵastyrady,-delingen habarlamada.
Qazaqstan ońtústikkoreıalyq týrıster úshin tartymdy baǵytqa aınalǵany týraly jazdyq.