Eńbek mınıstrligi múgedektigi bar jandarǵa arnalǵan quraldardy jetkizýshilerdi jiti baqylaıdy
ASTANA. KAZINFORM – Qazaqstanda múgedektigi bar adamdardy ońaltýdyń tehnıkalyq quraldarymen jáne jeke gıgıena quraldarymen qamtamasyz etetin ónim berýshilerge baqylaý kúsheıtiledi. Bıyl talaptarǵa sáıkes kelmegen 551 ónim berýshi Áleýmettik qyzmetter portalynyń tiziliminen shyǵaryldy.
Bul másele Prezıdenttiń áleýmettik máseleler jónindegi keńesshisi Alekseı Tsoı, Eńbek jáne halyqty áleýmettik qorǵaý mınıstri Asqarbek Ertaev, Densaýlyq saqtaý mınıstrligi men beıindi uıymdar ókilderi qatysqan jumys keńesinde talqylandy.
Keńeste múgedektigi bar adamdardy ońaltýdyń tehnıkalyq quraldarymen jáne jeke gıgıena quraldarymen qamtamasyz etý, usynylatyn buıymdardyń sapasyn arttyrý, ónim berýshilerdiń qyzmetin baqylaý jáne protsesterdi odan ári tsıfrlandyrý máseleleri qaraldy.
Áleýmettik qyzmetter portalynyń ashyqtyǵyn arttyrýǵa erekshe nazar aýdaryldy. Eńbek mınıstrligi ónim berýshilerdiń qyzmetine keshendi taldaý júrgizip, memlekettik aqparattyq júıelerdegi derekterdi salystyrǵan.
– Taldaý barysynda ónim berýshilerdiń kadrlyq áleýeti, salyq aýdarymdary, naqty qyzmetiniń bolýy, qoıma oryndary men taýar qory, sondaı-aq yqtımal úlestestigi zerdelendi. Nátıjesinde 2026 jyly belgilengen talaptarǵa sáıkes kelmeıtin jáne basqa da negizder boıynsha 551 ónim berýshi Portal tiziliminen shyǵaryldy, – delingen mınıstrlik habarlamasynda.
Endi ónim berýshilerdi avtomattandyrylǵan verıfıkatsııalaý tetigi engiziledi. Onyń birinshi kezeńinde aqparattyq júıe memlekettik derekqorlar arqyly bereshek, eńbek sharttary jáne basqa da kórsetkishterdi avtomatty túrde tekseredi.
Kelesi kezeńde tsıfrlyq quraldar men geolokatsııa kómegimen taýarlardyń jáne qoıma oryndarynyń is júzinde bar-joǵy tekserilmek.
Aıta keteıik, buǵan deıin Shymkentte júrgizilgen monıtorıng nátıjesinde talaptardy buzǵan 35 jetkizýshi Áleýmettik qyzmetter portalynan shyǵarylǵan bolatyn.
