Eńbek mınıstrligi men BUU genderlik teńdikti nyǵaıtý boıynsha jańa kelisimderge keldi
ASTANA. KAZINFORM — QR Eńbek jáne halyqty áleýmettik qorǵaý mınıstri Svetlana Jaqypova Ortalyq Azııa úılestirý keńsesiniń basshysy jáne Qazaqstandaǵy «BUU-áıelder» qurylymynyń Eldik keńsesiniń ókili Djeren Gýven Gýrespen kezdesti. Kezdesý barysynda taraptar uıymdardyń aǵymdaǵy jumysy men aldaǵy yntymaqtastyqtyń perspektıvalaryn talqylady. Bul týraly vedomstvonyń baspasóz qyzmeti málim etti.
Eńbek mınıstri Djeren Gýven Gýresti jańa qyzmetke taǵaıyndalýymen quttyqtap, mınıstrliktiń BUU júıesiniń uıymdarymen tyǵyz ózara is-qımyly týraly atap ótti. Onyń ishinde «BUU-áıelder» qurylymymen birlesip Qazaqstannyń genderlik teńdikti ilgeriletý jáne áıelderdiń ekonomıkalyq múmkindikterin keńeıtý salasyndaǵy strategııalyq baǵyttaryn iske asyrý jónindegi jumystyń nátıjelerine, sondaı-aq áıelderge qatysty zorlyq-zombylyqtyń aldyn alý jáne oǵan qarsy kúres baǵytyndaǵy keshendi qoldaý sharalaryna toqtaldy.
— Qazaqstan genderlik teńdik salasyndaǵy negizgi halyqaralyq qujattardy ratıfıkatsııalady: Áıelderge qatysty kemsitýshiliktiń barlyq nysandaryn joıý týraly BUU konventsııasy, Beıjiń deklaratsııasy men is-qımyl platformasy. Genderlik saıasat «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly» jáne «Turmystyq zorlyq-zombylyq týraly» zańdarmen retteledi, sondaı-aq 2030 jylǵa deıingi otbasylyq jáne genderlik saıasat tujyrymdamasy qabyldandy, — dedi Svetlana Jaqypova.
Ol sondaı-aq elimizde QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jumys isteıtinin atap ótti. El zańnamasynda qyzmetkerlerdiń eńbekke teń aqy alý quqyǵy, ıaǵnı bir kásip nemese birdeı laýazym boıynsha jumys isteıtinderge jalaqynyń teń bolýy, kez kelgen kemsitýshilikke jol bermeý qaǵıdattary kózdelgen. Bul óz kezeginde erler men áıelderdiń eńbek quqyqtarynyń teńdigin qamtamasyz etýge baǵyttalǵan Halyqaralyq eńbek uıymynyń (HEU) birqatar konventsııalaryn ratıfıkatsııalaýǵa múmkindik berdi.
Svetlana Jaqypova sondaı-aq qazaqstandyqtardyń áleýmettik kepildikterin qamtamasyz etý, jańa áleýmettik saıasatty iske asyrý jáne Qazaqstannyń áleýmettik ádilettilik jónindegi HEU-nyń jahandyq koalıtsııasyna qosylýy jónindegi basqa da jumystar týraly aqparat berdi.
Óz kezeginde Djeren Gýven Gýres Ortalyq Azııadaǵy «BUU-áıelder» úılestirý keńsesiniń uıym mandatyn óńirde iske asyrýdaǵy róli týraly habarlady.
Kezdesý barysynda taraptar genderlik teńdikti ilgeriletý jáne Qazaqstandaǵy áıelderdiń quqyqtary men múmkindikterin keńeıtý jónindegi strategııalyq áriptestikti odan ári damytý perspektıvalaryn da talqylady.
Qazaqstan genderlik teńdik úshin ne istep jatyr? Sarapshy maqalasynan oqyńyz.