Eńbek mınıstrligi komada jatqan naýqastar úshin múgedektikti rásimdeý tártibin jeńildetti
ASTANA. KAZINFORM - QR Eńbek jáne halyqty áleýmettik qorǵaý mınıstrligi ómirlik qıyn jaǵdaıǵa tap bolǵan azamattardyń otbasylaryna áleýmettik qoldaý kórsetý tásilderin qaıta qarap jatyr, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Osy maqsatta vedomstvo medıtsınalyq-áleýmettik saraptama júrgizý jáne memlekettik tólemderdi taǵaıyndaý qaǵıdalaryna ózgerister ázirledi. Usynylyp otyrǵan túzetýler komada jatqan azamattarǵa qatysty qujattardy rásimdeý tártibin edáýir jeńildetýdi kózdeıdi.
Engiziletin ózgeristerdiń basty maqsaty – ákimshilik kedergilerdi joıý jáne azamattardyń memleket kepildik bergen áleýmettik qoldaý sharalaryna kedergisiz qol jetkizýin qamtamasyz etý. Buǵan deıin mundaı jaǵdaılarda qujat rásimdeý protsesi azamattar úshin biraz qıyndyqtar týǵyzatyn. Endi jańa tártipke sáıkes medıtsınalyq-áleýmettik saraptamaǵa ótinish berý quqyǵy naýqastyń jaqyn týystaryna nemese jubaıyna zań júzinde bekitiledi.
Bul tásil birqatar mańyzdy máselelerdi jedel sheshýge múmkindik beredi. Atap aıtqanda, komada jatqan azamatqa múgedektik mártebesin ýaqytyly belgileý jáne memlekettik járdemaqyny der kezinde taǵaıyndaý jeńildeıdi. Sonymen qatar usynylyp otyrǵan normalar tólemderdi rásimdeý úderisin barynsha ashyq ári qoljetimdi etip, atalǵan sanattaǵy azamattarǵa kórsetiletin áleýmettik kómektiń tıimdiligin arttyrýǵa yqpal etedi.
Osyǵan deıin habarlaǵanymyzdaı, 2022 jyldan bastap oqýǵa túsken medıtsına mamandary jańa júıe boıynsha jumys isteıdi.
