Eńbek mınıstrligi «Qaztsınktegi» jarylysqa ne sebep bolýy múmkin ekenin atady
ASTANA. KAZINFORM – QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev «Qaztsınk» zaýytyndaǵy jarylysqa ne sebep bolýy múmkin ekenin aıtty.
Onyń aıtýynsha, qazir kásiporynda memlekettik eńbek ınspektsııasy jáne tótenshe jaǵdaılar organdarynyń birlesken tergeý toby jumys istep jatyr.
- Qazir bul jaǵdaıdyń naqty sebebin anyqtap jatyrmyz, ıaǵnı qaýipsizdik sharalaryn saqtamaý nemese adamnyń qaýipsizdik sharalaryn bilmeýi, kásiporynda tehnologııalyq aqaý nemese eskirgen jabdyqty aýystyrmaý sııaqty nusqalar tekserilip jatyr. Sebebin anyqtaımyz jáne odan keıin jaýaptylar jazaǵa tartylady, - dedi E. Tuıaqbaev Senattyń jalpy otyrysynan keıin tilshiler suraǵyna jaýap bere otyryp.
Sondaı-aq vıtse-mınıstrge kásiporyndaǵy eńbek jaǵdaıy men ónerkásiptik qaýipsizdik boıynsha sońǵy ret qashan tekserý bolǵany týraly suraq qoıyldy.
— Іri kásiporyndardyń barlyǵy táýekeli joǵary aımaqqa kiredi. Sondyqtan jyl saıyn profılaktıkalyq qadaǵalaý júrgizemiz. Byltyr jáne onyń aldyndaǵy jyly «Qaztsınk» pen basqa da iri kásiporyndardyń qyzmetine tekserý boldy. Tıisti nusqaýlar ýaqytyly oryndaldy», - dedi vıtse-mınıstr.
Eske salsaq, buǵan deıin Óskemendegi kásiporynda jarylys bolǵany habarlanǵan.
Sonyń saldarynan eki adam qaza bolyp, beseýi zardap shekti.
Jarylysqa qatysty polıtsııa qylmystyq is qozǵady.
