Eńbek mınıstrligi kásiptik táýekelderdi basqarý qaǵıdalaryn keńeıtýdi josparlap otyr
ASTANA. KAZINFORM - QR Eńbek jáne halyqty áleýmettik qorǵaý mınıstrligi Kásiptik táýekelderdi basqarý qaǵıdalaryna (budan ári – Qaǵıdalar) ózgerister engizbek. Vedomstvo basshysynyń tıisti buıryq jobasy týraly aqparat «Ashyq NQA» portalynda jarııalandy, dep habarlaıdy mınıstrliktiń baspasóz qyzmeti.
Engizilgen jańashyldyqtar aıasynda kásiptik táýekelderdi basqarý úderisteri tsıfrlandyrylady, táýekelderdi baǵalaý jónindegi sarapshylar men mamandandyrylǵan uıymdarǵa qoıylatyn talaptar kúsheıtiledi, sondaı-aq óndiristik keńesterdiń róli artady.
Qaǵıdalarda kásiptik aýrýlardyń aldyn alýǵa jáne jaraqattanýdy tómendetýge baǵyttalǵan ózgerister, jeke táýekel kórsetkishterin engizý jáne basqa da jańashyldyqtar qarastyrylǵan.
Budan bólek, kásibı táýekelderdi tikeleı jumys ornynda jeke baǵalaýǵa kóshý kózdelgen.
Jobany qabyldaý táýekelderdi basqarý sapasyn arttyrýǵa jáne óndiristegi jazataıym oqıǵalar sanyn azaıtýǵa yqpal etedi.
Buıryq jobasy týraly aqparat 2025 jylǵy 17 jeltoqsanǵa deıin qoǵamdyq talqylaýǵa arnalǵan «Ashyq NQA» ınternet-portalynda ornalastyrylǵan.
Osyǵan deıin eńbek qaýipsizdigi salasyndaǵy oqytý júıesine ózgerister engiziletini týraly habarlaǵan edik.