Eńbek mınıstrligi ınklıýzıvti saıasat tujyrymdamasyn ázirleýge kiristi
ASTANA. KAZINFORM – Eńbek jáne halyqty áleýmettik qorǵaý mınıstrligi ınklıýzıvti saıasattyń 2030 jylǵa deıingi tujyrymdamasyn ázirleý jumysyna kiristi. Osyǵan oraı búgin atalǵan mınıstrlikte úkimettiń emes uıymdardyń, memlekettik organdardyń ókilderi kezdesý ótkizdi.
«Ótken jyldyń jeltoqsanynda Prezıdent «Adam quqyqtary men zań ústemdigi salasyndaǵy is-qımyl jospary týraly» Jarlyqqa qol qoıdy. Atalǵan josparǵa sáıkes, Eńbek jáne halyqty áleýmettik qorǵaý mınıstrligine ınklıýzıvti saıasattyń 2030 jylǵa deıingi tujyrymdamasyn jyldyń sońyna deıin ázirlep, bekitý tapsyryldy. Tujyrymdamany ázirleý maqsaty – múgedekterdiń quqyǵyn qamtamasyz etý, olardy tynys-tirshiliktiń barlyq salasyna áleýmettik yqpaldastyrý. Sondyqtan da memlekettik organdarmen birge barlyq ÚEU-lermen problemalardy talqylap, árbir baǵyt boıynsha usynystardy jınaýdy jáne olardyń pikirlerin tujyrymdamany ázirleý barysynda eskerýdi josparlap otyrmyz», - dedi Eńbek jáne halyqty áleýmettik qorǵaý vıtse-mınıstri Nazgúl Saǵyndyqova.
Vıtse-mınıstr dereginshe, búginde elimizde múgedektigi bar 725 myń adam bar. Olardyń shamamen 400 myńy jumys isteýge qabiletti jasta, 109 myńy - balalar jáne 200 myńǵa jýyǵy - zeınetkerler.
«ITeachMe» qoǵamdyq qorynyń jetekshisi Zahıra Begalıeva ınklıýzıvti saıasat tujyrymdamasy elimiz úshin asa mańyzdy strategııalyq qujat ekenin aıtady.
«Inklıýzııa múgedektigi bar tulǵanyń týǵannan búkil ómir boıy ereksheligin esepke alý degendi bildiredi. Inklıýzııa Qazaqstan azamattaryn qoldaýǵa baǵyttalǵan barlyq memlekettik baǵdarlamaǵa engizilýi tıis. Іs júzinde adam densaýlyǵyna nemese basqa da erekshelikterine qaramastan ózin tolyqtaı kórsete alýy óte mańyzdy», - dedi ol.
