Eńbek mınıstrligi halyqtyń osal toptaryn baqylaý úshin tsıfrlyq quraldardy paıdalanbaq
ASTANA. KAZINFORM - QR Eńbek jáne halyqty áleýmettik qorǵaý mınıstrligi azamattarǵa ataýly qoldaý kórsetý maqsatynda óńirlik Mansap ortalyqtarynyń jumysyn jetildirip jatyr.
Mınıstr Asqarbek Ertaevtyń tóraǵalyǵymen ótken jumys keńesinde jańa algorıtm tanystyryldy: endi negizgi kúsh-jiger «basym topqa» – óz betinshe jumys tabýy qıyn úmitkerlerge baǵyttalady.
Eńbek naryǵyn jan-jaqty taldaý 93,5 myń adamnan turatyn nysanaly topty aıqyndaýǵa múmkindik berdi. Bul sanatqa áleýmettik jaǵdaıy tómen azamattar, jumys tájirıbesi joq nemese eńbek ótilinde alty aıdan astam úzilisi bar adamdar, sondaı-aq orta jáne tehnıkalyq kásiptik bilimi bar úmitkerler engizildi.
Eńbek naryǵyndaǵy orny birshama turaqty azamattar (joǵary bilimi nemese jýyrdaǵy jumys tájirıbesi barlar) qoldaýdy eń muqtaj toptarǵa baǵyttaý úshin bul tizimnen shyǵaryldy. Endi dál osy basym top úshin jeke súıemeldeý júıesi qalyptastyrylady.
Árbir osyndaı azamatty jumyspen qamtýdy qatań baqylaý maqsatynda mınıstrlik aqparattyq júıege jańa tsıfrlyq quraldardy engizdi.
Endi Mansap ortalyqtary arnaıy aqparattyq panel arqyly basym toptaǵy barlyq úmitkerdi naqty ýaqyt rejıminde aty-jóni boıynsha kóre alady. Júıe kún saıynǵy dınamıkany baqylap, azamatqa qandaı naqty qoldaý sharalary usynylǵanyn tekserýge múmkindik beredi.
Alaıda óńirlerdegi sala mamandarynyń qazirgi jumys qarqyny edáýir kúsheıtýdi qajet etedi.
Monıtorıng derekterine sáıkes, búgingi tańda nysanaly toptaǵy nebári 39,8 myń adam ǵana jumyspen qamtý sharalarymen qamtylǵan. Osyǵan baılanysty mınıstr óńirlik Mansap ortalyqtaryna naqty mindet júktedi: árbir jumyssyz azamatpen jeke, ataýly sharalardy túbegeıli kúsheıtip, ony jumys ornyna ornalasqanǵa deıin tolyq súıemeldeýdi qamtamasyz etý.
Osyǵan deıin áleýmettik osal toptarǵa baspana alýda qandaı qoldaý kórsetiletini týraly jazdyq.
37/
