Eńbek mınıstrligi halyqty jumyspen qamtýǵa bólingen 70 mlrd teńge bıýdjetke keri qaıtarmaqshy

ASTANA. KAZINFORM – Májilistiń jalpy otyrysynda Eńbek jáne halyqty áleýmettik qorǵaý mınıstri Svetlana Jaqypova Sýbsıdııalanatyn jumys oryndarynyń eki baǵyty qysqartylatynyn málim etti.

— 2024 jyly biz sýbsıdııalanatyn jumys oryndaryna saraptama júrgizip, birneshe is qozǵaý úshin quqyq qorǵaý organdaryna júginip, 42 mlrd teńgeni qaıtarý baǵytynda jumys istep jatyrmyz, — dedi ol depýtat suraǵyna bergen jaýabynda.

Aıtýynsha, Premer-mınıstrdiń tapsyrmasymen osy baǵyttaǵy Úkimet qaýlysyna ózgerister engizilip otyr.

— 6 baǵytta beriletin sýbsıdııaǵa negizdelgen jumys oryndarynyń 2 baǵyty ońtaılandyrýdan ótedi. Ol — «Birinshi jumys orny» jáne «Urpaqtar kelisimsharty». Sonyń nátıjesinde jáne qabyldanǵan tsıfrlyq sheshimderdiń nátıjesinde sýbsıdııalanatyn jumys oryndaryn ashatyn jumys berýshilerge biraz talaptar qoıyp otyrmyz. Mysaly, osy shart boıynsha jumys alynǵan adam eńbek naryǵynda bir jyldan kem emes jumys isteý kerek. Shtattyq kestede sýbsıdııalanatyn jumys oryndarynyń sany 10 paıyzdan aspaýy kerek. Ondaı sýbsıdııa alatyn jumys berýshiniń jalaqy bereshegi bolmaý kerek jáne áleýmettik tólemder ýaqtyly tólengen bolýy shart. Sonyń arqasynda jyl aıaǵyna deıin bıýdjetke 70 mlrd teńgeni qatarmyz degen esebimiz bar, — dedi mınıstr.

Eske salsaq, jýyqta Almatyda jumyspen qamtý basqarmasynyń bólim basshysy sottalǵan bolatyn.