Eńbek mınıstrligi halyqty jumyspen qamtýda JI paıdalanady
ASTANA. KAZINFORM — 1 shildeden bastap Mańǵystaý jáne Pavlodar oblystarynda JI qoldanatyn «Tsıfrlyq jumyspen qamtý qyzmetiniń» jańa modeli pılottyq rejımde iske qosylady. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málimdedi.
Jańa Konstıtýtsııanyń erejelerin iske asyrýda mınıstrlik halyqty nátıjeli jumyspen qamtýǵa járdemdesý, áleýmettik qoldaýdyń ataýlylyǵyn arttyrý jáne áleýmettik-eńbek salasyn tsıfrlandyrý boıynsha basty baǵyttarda jumys istemek.
— Bıyl birinshi toqsannyń qorytyndysy boıynsha jumyssyzdyq deńgeıi 4,5% paıyzdy qurady. Jumyspen qamtýǵa járdemdesý sharalarymen shamamen 228 myń azamat qamtyldy. Ekonomıkada josparlanǵan 3,1 mln sapaly jumys ornynyń 2,9 mıllıony qamtamasyz etildi, — dedi Asqarbek Ertaev búgingi Úkimet otyrysynda.
Aldaǵy jumys halyqty jumyspen qamtýǵa járdemdesýdiń neǵurlym belsendi modeline kóshýge baǵyttalmaq. Mansap ortalyqtary «bek-ofıs» modelinen «front-ofıs» modeline aýysady. Negizgi basymdyq beıresmı jumyspen qamtýdy anyqtaýǵa, azamattardy ataýly súıemeldeýge jáne olardy turaqty jumysqa ornalastyrýǵa baǵyttalady.
— Múgedektigi bar adamdardy jumyspen qamtýǵa járdemdesýdiń jańa modeli engiziledi. Jumys oryndaryn kvotalaý mehanızmi keńeıtiledi: atap aıtqanda, kvotalardy avtomatty túrde belgileý jáne olardyń oryndalýyn monıtorıngteý júrgiziledi, — dep atap ótti mınıstr.
Platformalyq jumyspen qamtýdy resmılendirý jáne ınternet-platforma jumyskerlerin jumystardy oryndaý kezindegi qorǵaý sharalarymen jáne mehanızmderimen qamtý jumystary jalǵasady.
Eńbek naryǵynyń ınklıýzıvtiligin arttyrý maqsatynda «Kúmis jas» jobasyn iske asyrý jalǵasady. Jumys oryndaryn qurý keńeıtiledi. Azamattardy kreatıvti ındýstrııalar salasyna tartý jumystary kúsheıtilmek.
Kásiptik oqytý jáne jańa daǵdylardy meńgerý tásilderi qaıta qaralady. Oqytý eńbek naryǵynyń qajettilikterin eskerip, azamattardy alǵan biliktiligi boıynsha keıinnen jumysqa ornalastyrýǵa baǵyttalýy tıis.
— 1 shildeden bastap Mańǵystaý men Pavlodar oblystarynda JI qoldanatyn «Tsıfrlyq jumyspen qamtý qyzmeti» jańa modeli iske qosylady. Bul jumyspen qamtýǵa járdemdesý boıynsha súıemeldeýge, bos jumys oryndaryn tańdaýdy jedeldetýge, oqytý boıynsha usynystardy derbestendirýge jáne kórsetiletin qyzmetterdiń sapasyn arttyrýǵa múmkindik beredi, — dedi Asqarbek Ertaev.
Keshe Parlament palatalarynyń birlesken otyrysynda Memleket basshysy Qasym-Jomart Toqaev áleýmettik salalarǵa 19 trıllıon teńgeden astam qarjy bólinetinin aıtqan edi.
