Eńbek mınıstrligi bıyl 10 myńnan astam adamdy suranysqa ıe jumysshy mamandyqtarǵa úıretpek
ASTANA. KAZINFORM - QR Eńbek jáne halyqty áleýmettik qorǵaý mınıstri Asqarbek Ertaev elimizde 2026 jyly suranysqa ıe jumysshy mamandyqtar boıynsha (slesarlar, elektr mamandary, gazben kesýshiler jáne t.b.) 10 myńnan astam azamatty daıarlaý josparlanyp otyrǵanyn málim etti. Bul týraly ol vedomstvonyń alqa otyrysynda málimdedi, dep habarlaıdy mınıstrliktiń baspasóz qyzmeti.
Ol keltirgen derekterge qaraǵanda, Skills.enbek platformasy arqyly 100 myńǵa jýyq adam oqytýmen qamtylady, 500 myń oqýshy Enbek.kz saıtynda jumys izdeý daǵdylaryna úıretiledi, al 100 myń oqýshy Mansap.enbek platformasynda kásiptik baǵdarlaý dıagnostıkasymen qamtylatyn bolady.
2026 jyly tehnologııalyq transformatsııanyń mańyzdy kezeńi «JI negizindegi Tsıfrlyq jumyspen qamtý qyzmetin» tolyq aýqymdy engizý bolmaq.
Enbek.kz Elektrondyq eńbek bırjasy biryńǵaı tsıfrlyq alań bolyp tabylady, onda qazirdiń ózinde 900 myńnan astam jumys berýshi jáne 3,3 mıllıonnan astam jumys izdeýshi tirkelgen. 2025 jylǵy statıstıka kórsetkendeı, azamattar onlaın rejımge belsendi túrde aýysýda: proaktıvti jáne elektrondyq formattarda 1 mln 37 myń jumys izdeýshi (jalpy sannyń 91%), 891 myń jumyssyz (97%) tirkeldi, al jumysynan aıyrylý jaǵdaıyna baılanysty áleýmettik tólem 158 myń adamǵa taǵaıyndaldy.
- Mınıstrlik 2026 jyly jumyssyzdyqty tirkeýden ony erte anyqtaýǵa jáne aldyn alýǵa kóshedi. Basty nazar túlekterdi, bosatylatyn jumyskerlerdi jáne zeınetaqy jarnalary toqtatylǵan adamdardy monıtorıngteýge aýdarylatyn bolady, - dedi mınıstr.
Sondaı-aq mınıstr jumys berýshilerdiń formaldy qatysýyn boldyrmaý úshin 2026 jylǵy 1 sáýirden bastap sýbsıdııalanatyn jumys oryndaryn uıymdastyrýǵa menshik nysanyna qaraı saralanǵan tásilder qoldanylatynyn aıtty.
Sondaı-aq memlekettik bıznes-granttardy berýdi monıtorıngteýdiń eki deńgeıli tsıfrlyq júıesi engizilip jatyr: birinshi deńgeıde qarajattyń nysanaly paıdalanylýy qadaǵalansa, ekinshi deńgeıde jobalardyń uzaq merzimdi turaqtylyǵy men jumyspen qamtý deńgeıi baǵalanady. Budan bólek, bıyl múgedektigi bar adamdardy jumysqa ornalastyrýǵa arnalǵan kvotalardy belgileý úderisi tolyq avtomattandyrylatyn bolady.
Osyǵan deıin Eńbek mınıstrliginiń 2026 jyly jarty mıllıonnan astam adamdy jumysqa ornalastyrýdy josparlap otyrǵany týraly jazdyq.