Eńbek mınıstrligi aýylda jumyspen qamtýdyń jańa formalaryn engizýi múmkin
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova aýyl sharýashylyǵynda jumyspen qamtýdyń jańa erejeleri qabyldanatynyn aıtty.
Mınıstrdiń aıtýynsha, aýyl sharýashylyǵynda jumyspen qamtýdy zańdyq turǵydan ashyq rásimdeý – aýyldyq aýmaqtardyń turaqty damýyn qamtamasyz etýdiń negizgi mindetteriniń biri sanalady.
«Ulttyq statıstıka bıýrosynyń derekteri boıynsha 2023 jyly elimizdiń aýyl sharýashylyǵyndaǵy jumyspen qamtylǵan 1,1 mln jumyskerdiń jartysynan kóbi – ózin-ózi jumyspen qamtyǵandar. Olardyń jalaqysy respýblıkalyq deńgeıdegi ortasha eńbekaqydan eki ese derlik tómen. Bul formaldy emes jumyspen qamtýdyń joǵary deńgeıin jáne aýyl jumyskerleriniń áleýmettik qorǵalýynyń tómen deńgeıin kórsetedi», - dedi S. Jaqypova Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.
Mınıstrlik ǵylymı jáne saraptamalyq qaýymdastyqtarmen jáne Aýyl sharýashylyǵy mınıstrligimen birlesip, sońǵy 24 jyldaǵy aýa raıy týraly kóptegen málimetterdi taldaǵan. Bul derekter túrli aýmaqtardaǵy klımat pen topyraqtyń barlyq erekshelikterin eskeretin arnaıy matematıkalyq modelder jasaýǵa múmkindik berdi.
«Osy modelderdiń kómegimen biz árbir jerge qatysty naqty usynystar jasadyq. Negizgi ereksheligi – barlyq mehanıkalandyrylǵan jumysty normalaý, bul aýyldaǵy naqty jumyspen qamtýdy baqylaýǵa múmkindik beredi. Mal basyna qyzmet kórsetý normalary qalyptastyryldy jáne jumysshylardyń normatıvtik sanynyń esebi júrgizildi. Aýylda jumyspen qamtýdyń jańa formalaryn (vahtalyq, maýsymdyq, mobıldi kásipkerlik) engizý máselesi qarastyrylýda», - dedi Eńbek mınıstri.
Osy júıeni engizý nátıjeleri aýyl sharýashylyǵynda resýrstardy paıdalaný tıimdiligin arttyrýǵa, onyń eldiń JІÓ qurylymyndaǵy úlesin arttyrýǵa, aýyl sharýashylyǵynda jumyspen qamtýdy rásimdeýge jáne ulǵaıtýǵa, aýyldyq jerlerden qalalarǵa kóshi-qon aǵyndaryn tómendetýge yqpal etedi, dep túsindirdi mınıstr.
Buǵan deıin S. Jaqypova eldegi kóleńkeli jumys oryndary máselesin kótergen edi.
Sonymen birge, 19 myńnan astam taksı júrgizýshisi qyzmetin zańdastyrdy.
