Eńbek mınıstrligi arnaıy áleýmettik qyzmetter kórsetetin keıbir uıymdar úshin jańa standarttardy engizedi
ASTANA. KAZINFORM - QR Eńbek jáne halyqty áleýmettik qorǵaý mınıstrligi múgedektigi bar balalarǵa, adamdarǵa jáne qarttarǵa arnalǵan shaǵyn syıymdylyqtaǵy úıler men kúndizgi kútim bólimsheleri úshin jańa standarttardy ázirledi.
Mınıstrliktiń baspasóz qyzmetiniń habarlaýynsha, vedomstvo basshysynyń tıisti buıryq jobasy týraly aqparat «Ashyq NQA» portalynda jarııalandy.
Atalǵan standarttardy engizý arnaıy áleýmettik qyzmetter (budan ári – AÁQ) kórsetetin uıymdardyń qyzmet tıimdiligin olardyń túrlerin naqty aıqyndaý arqyly arttyrýǵa múmkindik beredi.
Buǵan deıin múgedektigi bar balalarǵa, múgedektigi bar adamdarǵa jáne qarttarǵa arnalǵan shaǵyn syıymdylyqtaǵy úıler men kúndizgi kútim bólimsheleriniń qyzmetinde statsıonarlyq jáne jartylaı statsıonarlyq jaǵdaılarda AÁQ kórsetýge arnalǵan qoldanystaǵy standarttar paıdalanylyp kelgen.
Jeke, derbes standarttardy qoldaný AÁQ kórsetýdi ońtaılandyrýǵa, sondaı-aq qajet bolǵan jaǵdaıda uıymdardyń naqty bir túriniń jumysyna nysanaly ózgerister engizý arqyly olardyń qyzmet tıimdiligin odan ári arttyrýǵa múmkindik beredi.
Jalpy alǵanda, atalǵan jańashyldyqtardy iske asyrý ómir súrý sapasyn arttyrýǵa, áleýmettik qoldaý nysandaryn keńeıtýge jáne barynsha ınklıýzıvti ári qoljetimdi áleýmettik ortany qalyptastyrýǵa baǵyttalǵan.
Qazaqstan Respýblıkasy Premer-Mınıstriniń orynbasary – Eńbek jáne halyqty áleýmettik qorǵaý mınıstriniń 2023 jylǵy 29 maýsymdaǵy № 263 «Halyqty áleýmettik qorǵaý salasynda arnaıy áleýmettik qyzmetter kórsetý standarttaryn bekitý týraly» buıryǵyna ózgerister engizý jobasy jónindegi aqparat 2026 jylǵy 2 aqpanǵa deıin «Ashyq NQA» ınternet-portalynda qoǵamdyq talqylaý úshin ornalastyrylǵan.
Osyǵan deıin áleýmettik qyzmetter portalyna taýarlardy sáıkestendirý kodtarymen engizý tártibi ózgeretini týraly jazdyq.