Eńbek mınıstrligi arendalyq baspanany jekeshelendirý tártibin ázirlep jatyr

ASTANA. KAZINFORM – Eńbek jáne halyqty áleýmettik qorǵaý vıtse-mınıstri Erbol Ospanov arendalyq baspanany jekeshelendirý sharttary ár óńirde ár túrli bolýy múmkin ekenin aıtty. 

«Turǵyn úı qatynastary týraly» Zań boıynsha áleýmettik az qamtylǵan adamdardyń 11 sanaty bar. Elimizde solardy baspanamen qamtýdyń túrli baǵdarlamasy bar. Onyń ishinde satyp alý quqyǵynsyz jáne satyp alý quqyǵy bar arendalyq baspana sııaqty tetikter kózdelgen.
Ónerkásip jáne qurylys mınıstrligimen, «Otbasy bankpen» birge osy arendalyq baspanany jaldaý ıeleriniń atyna qaratýdyń birneshe tetigin qarastyryp jatyrmyz. Búgin sizdermen kezdesýge deıin «Otbasy banktiń» áleýmettik az qamtylǵan sanattardy baspanamen qamtý mehanızmi tanystyryldy. Onyń ishinde arendalyq baspanamen qamtý jáne memleket tarapynan ondaı baspanany sýbsıdııalaý máselesi de bar. Bul tetik úshjaqty formatta pysyqtalyp jatyr», - dedi vıtse-mınıstr BAQ ókilderimen ótken kezdesýde.

Sondaı-aq, ol bul sharýa ár óńirde árqalaı sheshilip jatqanyn aıtty.

«Jekeshelendirý quqyǵynsyz berilgen arendalyq baspanany belgili bir baǵasyn tóleı otyryp jekeshelendirýge ruqsat berý týraly talap kóp aıtylyp júr. Ol úshin áýeli satyp alý baǵasyn bekitý kerek. Ol ár óńirde árqalaı. Jastar men ózge sanattarǵa jeke sharttar bar degendeı. Úsh tarap osy sharttardy pysyqtaýymyz kerek. Qandaı baǵamen, qandaı tarıfpen satyp alatynyn anyqtaý qajet. Ázirshe bul baǵytta jumys istep jatyrmyz», - dedi Erbol Ospanov.