Eńbek mınıstrligi áleýmettik qyzmetterge baqylaýdy kúsheıtpek
ASTANA. KAZINFORM — QR Eńbek jáne halyqty áleýmettik qorǵaý mınıstrliginde Mınıstr Asqarbek Ertaevtyń tóraǵalyǵymen apparattyq keńes ótti. Qatysýshylar arnaýly áleýmettik qyzmetterdi (budan ári – AÁQ), sondaı-aq zııandy jáne qaýipti eńbek jaǵdaılarynda jumys isteıtin azamattarǵa tólemder taǵaıyndaý máselelerin qarady. Bul týraly vedomstvonyń baspasóz qyzmeti málim etti.
Búgingi tańda elimizde AÁQ-ti 608 lıtsenzııalanǵan uıym, onyń ishinde 161 ÚEU usynatyny atap ótildi. Olardyń qyzmetiniń ashyqtyǵyn arttyrý, esepke alýdy avtomattandyrý jáne jalǵan málimetter qosý táýekelderin boldyrmaý maqsatynda EHÁQM men QR Qarjy mınıstrliginiń derekqorlaryn biriktirý boıynsha pılottyq joba bastaldy.
Zııandy jaǵdaılarda jumys isteıtin jumyskerlerdi áleýmettik qoldaý bóliginde vedomstvo QR Áleýmettik kodeksine túzetýlerdi ilgeriletý boıynsha jospar-keste ázirledi. Sonymen qatar eńbek zańnamasynyń saqtalýyn baqylaý sheńberinde táýekel dárejesin baǵalaý krıterııleri men tekserý paraqtary ózektendirilmek.
Keńes qorytyndysy boıynsha Mınıstr aýmaqtyq departamentter men beıindi komıtetterge halyqqa arnaýly áleýmettik qyzmetter kórsetýdiń úzdiksizdigin qamtamasyz etýdi tapsyrdy. Budan bólek, beıindi aqparattyq júıelerdi pysyqtaý, oryndaýshylyq tártipke baqylaýdy kúsheıtý jáne ázirlengen zańnamalyq túzetýlerdiń ýaqtyly ilgeriletilýin qamtamasyz etý boıynsha birqatar tapsyrmalar berildi.
Buǵan deıin Qazaqstanda ómirlik qıyn jaǵdaıda qalǵan adamdarǵa qoldaý kórsetý erejeleri jańartylǵanyn jazdyq.
