Eńbek mınıstrligi AÁK-ti proaktıvti taǵaıyndaýda JI-ni qoldanady
ASTANA. KAZINFORM — QR Eńbek jáne halyqty áleýmettik qorǵaý mınıstrligi ataýly áleýmettik kómekti (AÁK) proaktıvti túrde taǵaıyndaý kezinde jasandy ıntellekt tehnologııalaryn qoldanýdy josparlap otyr.
Memleket basshysy 2025 jylǵy 8 qyrkúıektegi Joldaýynda Qazaqstandy úsh jyl ishinde tolyqqandy tsıfrlyq memleketke aınaldyrýdy strategııalyq mindet retinde aıqyndady.
Eńbek mınıstrligi áleýmettik-eńbek salasyndaǵy qyzmetterdi tsıfrlandyrý boıynsha, onyń ishinde JI engizý baǵytynda da júıeli jumys júrgizip jatyr.
— Búgingi tańda biz jasandy ıntellektini Random Forest Classifier modeliniń kómegimen «oqytyp» jatyrmyz. Bul — taǵaıyndaý kezinde sheshim qabyldaýǵa áser etetin kóptegen faktordy biriktirý arqyly neǵurlym dál jáne turaqty nátıjeler alýǵa múmkindik beretin eń tıimdi mashınalyq oqytý algorıtmderiniń biri. Osylaısha, AÁK alýǵa quqyǵy bar adamdar avtomatty túrde anyqtalatyn bolady. Qazirgi ýaqytta model keshendi valıdatsııadan ótti, dáldik deńgeıi 90%-dan asty, bul onyń engizýge daıyn ekenin kórsetedi, — dep habarlady Eńbek jáne halyqty áleýmettik qorǵaý vıtse-mınıstri Oljas Anafın.
Aldaǵy ýaqytta bul tehnologııa AÁK-ke jańa ótinimderdi qaraý úshin pılottyq rejımde iske qosylady. Pılottyq kezeń barysynda JI modeliniń sheshimderine qatysty statıstıka jınalady.
Aıta ketý kerek, jobanyń alǵashqy kezeńinde JI qabyldaǵan sheshimder jergilikti atqarýshy organdar úshin usynymdyq sıpatta bolady. Keıinnen olardy sheshim qabyldaýdyń bir ólshemsharttarynyń biri retinde paıdalaný múmkindigi qarastyrylady.
Jobanyń ekinshi kezeńi «kompıýterlik kórý» tehnologııasyn qoldaný arqyly modeldiń múmkindikterin keńeıtýdi kózdeıdi. Bul kezeńde ótinimder sheńberinde usynylatyn foto jáne beınematerıaldar sııaqty vızýaldy derekterdi taldaý qarastyrylǵan. Bul tek mátindik aqparatty ǵana emes, sonymen qatar otbasynyń ál-aýqat deńgeıi men turmys jaǵdaılaryn neǵurlym obektıvti baǵalaýǵa múmkindik beretin vızýaldy belgilerdi de eskerýge jol ashady. Jańa derekter modeldi qosymsha oqytý úshin paıdalanylady, bul óz kezeginde sheshimderdiń dáldigin arttyrýǵa baǵyttalǵan.
Jobanyń úshinshi kezeńi jan-jaqty taldaý negizinde otbasylardy qıyn ómirlik jaǵdaıdan shyǵarýǵa baǵyttalǵan egjeı-tegjeıli jospardy usynýdy kózdeıdi. Bul jospar óńirlik, aýdandyq jáne naqty otbasy deńgeıinde ázirlenetin bolady.
Budan buryn Prezıdent Toqaev Jasandy ıntellektini damytý ádebi jónindegi dinaralyq komıssııa qurýdy usynǵanyn jazǵan edik.