Eńbek mınıstrligi 2026 jyly jarty mıllıonnan astam adamdy jumysqa ornalastyrýdy josparlap otyr
ASTANA. KAZINFORM - QR Eńbek jáne halyqty áleýmettik qorǵaý mınıstrliginiń keńeıtilgen Alqa otyrysynda vedomstvo basshysy Asqarbek Ertaev málim etti.
Otyrysty ashqan vedomstvo basshysy Asqarbek Ertaev búgingi tańda mınıstrlik jumysynyń bas strategııalyq basymdyǵy halyqty ónimdi jumyspen qamtýdy qamtamasyz etý jáne azamattardyń ekonomıkalyq belsendiligin yntalandyrý bolyp tabylatynyn atap ótti.
- Biz kúsh-jigerimizdi naqty jumysqa ornalastyrýdy qamtamasyz etý, turaqty jumys ondaryn qurý jáne azamattardyń ekonomıkalyq belsendiligin arttyrý baǵytyna jumsaýymyz qajet. Ótken jyldan bastap jumysqa ornalasý monıtorıngi tek mindetti zeınetaqy jarnalary týraly derekter negizinde júzege asyrylyp keledi. Bul bizge formaldy esepke alýdy tolyǵymen joıa otyryp, naqty jumyspen qamtylýdy obektıvti baǵalaýǵa kóshýge múmkindik berdi, – dep atap ótti Asqarbek Ertaev.
Ol keltirgen derekterge qaraǵanda, bul baǵyttaǵy jumys Eńbek naryǵyn damytý tujyrymdamasy aıasynda júrgizilip keledi. Qujattyń negizgi makroındıkatory – 2029 jylǵa qaraı sapaly jumys oryndarynyń sanyn 3,8 mıllıonǵa jetkizý.
2025 jyldyń qorytyndysy boıynsha ekonomıkada osyndaı 2,9 mln jumys ornynyń jumysy qamtamasyz etildi. 2026 jyly óńirlik kartalar sheńberinde 547,7 myń adamdy jumysqa ornalastyrý josparlanyp otyr. Bıylǵy jyldyń mańyzdy qadamy izdenýshilerge derbes baǵdardy (marshrýttardy) proaktıvti túrde tańdaýǵa múmkindik beretin «JI negizindegi Tsıfrlyq jumyspen qamtý qyzmetin» tolyq aýqymdy iske qosý bolmaq.
Vedomstvonyń basym mindetteriniń biri – múgedektigi bar adamdardy keshendi áleýmettik qorǵaý. Olardy jumyspen qamtý tásilderin jetildirý, tehnıkalyq qajet quraldarymen qamtamasyz etý jáne ınfraqurylym nysandarynyń qoljetimdiligin arttyrý máseleleri ózekti ekeni aıtyldy. Sondaı-aq, múgedektigi bar balalardy damytý men áleýmettendirýge erekshe nazar aýdaryldy.
Múgedektikti taǵaıyndaý rásiminiń ashyqtyǵyn qamtamasyz etý maqsatynda Premer-mınıstrdiń orynbasary Densaýlyq saqtaý mınıstrligi men Eńbek jáne halyqty áleýmettik qorǵaý mınıstrliginiń aqparattyq júıelerin biriktirýdi tapsyrdy. Memleket basshysy jarııalaǵan «Tsıfrlandyrý jáne jasandy ıntellekt jyly» aıasynda mınıstrlik aldynda áleýmettik-eńbek salasyn tehnologııalyq turǵyda jańǵyrtý boıynsha aýqymdy mindet turǵany sóz etildi.
Aıta keteıik, alqa otyrysynda qatysýshylar 2025 jylǵy memlekettik saıasatty iske asyrý qorytyndylaryn shyǵaryp, áleýmettik-eńbek salasyn damytýdyń 2026 jylǵa arnalǵan negizgi vektorlaryn aıqyndady. Basty nazarda – sapaly jumys oryndaryn qurý, adamı kapıtaldy damytý jáne memlekettiń áleýmettik kepildikterin oryndaý.
Osyǵan deıin Qazaqstanda 2030 jylǵa deıin 1,6 mıllıon maman qajet bolatyny týraly jazdyq.