Eńbek mınıstriliginiń tsıfrlandyrý salasynda 2019 jyldaǵy jospary qandaı
Vıtse-mınıstr sharaǵa qatysýshylarǵa vedomstvonyń jobalary týraly keńirek áńgimelep, 2019 jyldyń jospary týraly da aıtty.
«2018 jyly tsıfrlandyrý aıasynda Eńbektiń elektrondy bırjasy sekildi jobalar iske qosylyp, bul bastama elimizdegi barlyq vakansııalardy biriktirgenin aıta ketý kerek. Keıbir qyzmetter proaktıvti sıpat aldy. Máselen, jas analar SMS habarlama arqyly ótinim bermeıtin sıpatta járdemaqy alý qyzmetine qol jetkizdi. Sonymen birge, zeınetaqy taǵaıyndaý sekildi qyzmetter kompozıtti formatqa ıe boldy. Al buryn zeınetaqy úshin ártúrli jerde tórt ótinish jazýǵa týra keletin», - deıdi ol.
Narıman Muqyshevtyń aıtýyna qaraǵanda, Eńbek jáne halyqty áleýmettik qorǵaý mınıstrliginiń qyzmetteri tsıfrlandyrýdyń arqasynda edáýir jeńildetilip keledi. Máselen, 2018 jyly 7,7 mln kórsetilgen qyzmettiń 4,1 mıllıony elektrondy formatta usynylǵan (60 paıyzy). Osy jyly proaktıvti formatta 20,5 myń járdemaqy berilgen.
Zeınetaqy taǵaıyndaý boıynsha jańartylǵan qyzmet osy jyldyń qazan aıynda iske qosylǵan bolatyn. Endigi ýaqytta bazalyq ári jınaq zeınetaqysyn taǵaıyndaý tek bir ótinish arqyly júrgiziletin bolady.
«Sonymen qatar, bıylǵy jyldyń 1 qarashasynan bastap enbek.kz - Eńbektiń elektrondy bırjasynda kadrlyq esebi aqparattyq júıege qosylmaǵan uıymdarmen eńbek kelisimshartyn tirkeý boıynsha tegin servıs qosyldy», - deıdi vıtse-mınıstr.
Narıman Muqyshev óz sózinde atap ótkendeı, kelesi jyly mınıstrliktiń jumysyn ashyq túrde jarııalap otyratyn jobalar iske asyrylady.
«Olardyń biri retinde - memlekettik qyzmetterdiń trekıngin ataýǵa bolady. Atalmysh júıe memlekettik qyzmettiń kórsetilý satysyn ǵana emes, atqarýshynyń kim ekenin aıqyndap, másele týyndaı qalǵan jaǵdaıda sıgnal beredi. Sonymen birge, vedomstvo mınıstrliktiń qyzmetteri boıynsha táýlik boıy qyzmet kórsetetin vırtýaldy keńesshiniń qyzmetin bastap beredi», - deıdi vıtse-mınıstr.
