Eńbek mınıstri jańa zeınetaqy júıesimen tanystyrdy
ASTANA. QazAqparat - Búgin Ortalyq kommýnıkatsııalar qyzmetinde Qazaqstandaǵy jańa zeınetaqy júıesi tanystyryldy.
QR Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, jańa júıedegi birinshi komponent - zeınetkerlik jasqa jetken barlyq azamattarǵa olardyń eńbek ótili men jalaqysyna qaramastan, birdeı mólsherde respýblıkalyq bıýdjet qarajatynan memleket tóleıtin bazalyq zeınetaqy bolmaq.
«Jańa tásil bazalyq zeınetaqyny alýshynyń zeınetaqy júıesine qatysý ótiline baılanysty birqatar taǵaıyndaýlardy usynady. Birinshiden, azamattarda júıege qatysý ótili bolmaǵan jaǵdaıda olarǵa eń tómen kúnkóris kóleminiń 50%-yna teń keletin mólsherde áleýmettik zeınetaqy beriletin bolady. Ekinshiden, júıege qatysý ótili 20 jyl bolǵan jaǵdaıda onyń bazalyq zeınetaqysynyń mólsheri eń tómen kúnkóris deńgeıiniń 70%-yn quraıtyn bolady. Keıin koeffıtsıent júıege qatysqan árbir jyl úshin arttyrylyp otyrady. Úshinshiden, qatysý ótili 35 jyl bolǵan jaǵdaıda bazalyq zeınetaqy eń tómen kúnkóris deńgeıine teń bolady», - dep atap ótti mınıstr.
Onyń aıtýynsha, mundaı tásil zeınetaqy júıesine qatysýshy úsh býynnyń problemasyn ońtaıly sheshýge múmkindik beredi.
«Qazirgi zeınetkerler - adamdardyń bul sanatyna bazalyq zeınetaqy olar zeınetkerlikke shyǵar sátte usynǵan eńbek ótiline baılanysty esepteletin bolady;
2043 jylǵa deıin zeınetkerlik jasqa keletin yntymaqty, sol sııaqty jınaqtaýshy zeınetaqy júıesine qatysý ótili tolyq emes azamattar - adamdardyń bul sanatyna bazalyq zeınetaqy 1998 jylǵy 1 qańtarǵa deıin jınaqtalǵan eńbek ótili jáne jınaqtaýshy zeınetaqy júıesine 1998 jyldan keıingi qatysý ótili eskerile otyryp esepteletin bolady;
zeınetkerlikke 2043 jyldan keıin shyǵatyn adamdar - bazalyq zeınetaqy jınaqtaryna baılanysty esepteletin bolady», - deıdi T. Dúısenova.
