Eńbek mınıstri jańa normalar týrasynda: Taksı quny qymbattamaıdy
Bul týraly Senatta Áleýmettik kodekstiń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.
«Kodekstiń taǵy bir jańalyǵy jumyspen qamtylǵan azamattardyń áleýmettik qamsyzdandyrý deńgeıin arttyrýǵa qatysty. Qazaqstanda qoldanystaǵy 5 áleýmettik táýekel boıynsha saqtandyrý júıesi halyqaralyq standarttar men naqty ekonomıkalyq jaǵdaılarǵa sáıkes keledi. Júıeniń negizi saqtalady, biraq onyń maqsaty ózgeredi. Júıe áleýmettik tólemderdi júzege asyrýǵa ǵana emes, eń aldymen, resmı jumyspen qamtylǵan azamattardyń áleýmettik qorǵalý deńgeıin arttyrý úshin zańdy jumyspen qamtýdy yntalandyrýǵa baǵyttalatyn bolady», – dedi T. Dúısenova.
Onyń aıtýynsha, osy maqsatty oryndaý úshin Salyq kodeksine shaǵyn bıznestiń jaldamaly jumyskerleri úshin biryńǵaı mindetti tólemdi engizýge qatysty ózgerister engizildi.
«Ekinshiden, onlaın-platforma (ıAndeks Taksı, ıAndeks GO jáne t.b.) arqyly jumys isteıtin azamattar úshin arnaıy salyq rejımi engiziledi. Bul rette salyq agentteri rólinde onlaın platformalar operatorlaryn aıqyndaý usynylady. Olar osynda jumys isteıtin azamattar atynan tıisti tólemderdi júrgizedi», - dedi mınıstr.
Sonymen qatar mınıstr «táýelsiz jumysker», ıaǵnı tabys ákeletin eńbekpen aınalysatyn, biraq tıisti ýákiletti organdarda resmı memlekettik tirkeýi joq tulǵa uǵymy engizilgenin eske saldy.
«Eger táýelsiz jumysker óz qyzmetin onlaın platformalar ofertasyna qosylý nemese jarııa shart jasasý arqyly atqaratyn bolsa, onda bul adamdar resmı jumyspen qamtyldy dep tanylady. Mysaly, ıAndeks taksı onlaın platformasyna qosylǵan taksı júrgizýshileri, Glovo onlaın platformasyna qosylǵan kýrerler osy sanattaǵy jumyskerler qataryna kirgiziledi», - dedi T. Dúısenova.
Onyń aıtýynsha, bul jumyskerler úshin onlaın platformasynyń opretorlary salyq agentteri bolyp qaralyp, arnaýly salyq rejımderine sáıkes, jumyskerlerdiń paıdasyna salyq tólemderi men áleýmettik jarnalardy aýdaryp otyratyn bolady.
«Bul jaǵdaıda táýelsiz jumyskerler jaldamaly jumyskerler sııaqty respýblıkalyq bıýdjetten, memlekettik áleýmettik qordan jáne saqtandyrý kompanııalarynan áleýmettik tólemder alýǵa quqyly bolady. Tıisti aýdarymdar bolmaǵan jaǵdaıda, olarǵa zańda belgilengen eń tómengi memlekettik kepildikter ǵana beriledi», - dedi vedomstvo basshysy.
Osy oraıda Senatta ótken baspasóz máslıhatynda tilshiler mınıstrden «onlaın-platforma jumysshylaryna qatysty atalǵan áleýmettik paket taksı nemese basqa da qyzmetterdiń qunyn arttyrýy múmkin be», - dep surady.
«Bul qadamdar qyzmet tarıfiniń ósýine yqpal etpeıdi. Osy aptada taksıster qaýymdastyǵy ókilderimen kezdesip, túsindiremiz. Olardyń sharttarynda bıýdjetke baǵyttalatyn tólemder men áleýmettik aýdarymdar eskerilgen. Olar onlaın-platformalarǵa nemese deldaldarǵa aýdaryp jatqan komıssııa tólemderi aıasynda jumys jalǵasa beredi. Bul turǵyda eshkimge de qosymsha qarjylaı júkteme bolmaýy tıis. Budan bólek, tirkeýge turý úshin qosymsha qujattar da qarastyrylmaǵan. Óıtkeni bul adamdar atalǵan onlaın-platformamen jarııa shartty osyǵan deıin bekitken bolatyn», - dedi T. Dúısenova.
Budan buryn habarlanǵandaı, onlaın platformalar arqyly (ıAndeks Taksı, ıAndeks GO jáne t.b.) jumys isteıtin taksıster úshin arnaıy salyq rejımi engiziledi.
