Eńbek mınıstri zeınetaqy júıesin jetildirýge qatysty túsinik berdi
Mınıstr óz sózinde memleket el ekonomıkasynyń jaǵdaıyna qaramastan, barlyq áleýmettik mindettemelerdi oryndap jatqanyn atap ótti. Zeınetaqy men járdemaqy ýaqytynda tólenip keledi. Jyl saıyn olardyń mólsheri ınflıatsııa deńgeıin eskere otyryp ındeksteledi.
«2020 jyly halyqqa qosymsha qoldaý kórsetý úshin zeınetaqy men memlekettik járdemaqylar eki ret ındeksteldi. Bul ósim 4 mıllıon adamdy qamtydy. 2021 jyldyń basynan beri 2,2 mıllıonnan astam zeınetkerdiń yntymaqty zeınetaqysy 7 paıyzǵa kóterildi, bazalyq zeınetaqy men járdemaqynyń ósimi 5 paıyzdy qurady», - dedi S. Shápkenov.
Eńbekmıniniń basshysy, sondaı-aq, 2020 jylǵy 1 qańtardan bastap Memlekettik áleýmettik saqtandyrý qorynan (MÁSQ) múgedektik, asyraýshysynan aıyrylý jáne jumysynan aıyrylý jaǵdaılary boıynsha 131,7 myńnan astam adamǵa tólem orta eseppen 50 paıyzǵa kóbeıtilgenin aıtty.
2020 jyldyń qorytyndysynda bes áleýmettik táýekel boıynsha 947,2 myń áleýmettik tólem alýshyǵa MÁSQ-tan 257,3 mlrd teńge tólendi.
«Búgingi tańda zeınetaqymen qamsyzdandyrý júıesindegi eń ózekti másele – jınaqtaý júıesin damytý bolyp tur. Jınaqtaýshy júıe engizilgen 22 jyl ishinde jınaqtalǵan qarajattyń jalpy somasy 12,9 trln teńgeni qurady (01.01.2021 jylǵy jaǵdaı boıynsha). 162 myńǵa jýyq adam zeınetaqy jınaqtaryn aldy, onyń ortasha mólsheri aıyna 28 myń teńgeni quraıdy. Oń úrdisterge qaramastan, zeınetaqy jarnalaryn tóleýdiń turaqsyzdyǵy máselesi ózekti kúıinde qalyp otyr», – dedi mınıstr.
Qazirgi kezde Eńbek jáne halyqty áleýmettik qorǵaý mınıstrligi
2014 jyly bekitilgen Qazaqstan Respýblıkasynyń zeınetaqy júıesin
2030 jylǵa deıin odan ári jańǵyrtý tujyrymdamasyna ózgerister engizý ústinde ekenin atap ótti.
«Másele zeınetaqy júıesin ózgertý jaıynda emes! Ony eń tómengi kepildikter júıesin jetildirý jáne 2023 jyldan bastap jumys berýshilerden mindetti zeınetaqy jarnalaryn engizý bóliginde odan ári jetildirý kózdelýde», – dep túsindirdi Serik Shápkenov.